Қызылорда облысында құрылыс индустриясын жаңа деңгейге көтеретін ірі өндірістік жобаны жүзеге асыруға басымдық беріліп отыр. Өңірге шетелдік инвестор тарту бағытындағы жұмыстың нақты нәтижесі ретінде испандық «Roca Group» компаниясының санитарлық-техникалық бұйымдар өндіретін зауытын атауға болады. Жоба іске қосылған жағдайда еліміздің құрылыс нарығындағы маңызды бір мәселе – импортқа тәуелділікті азайтуға мүмкіндік бермек.
Облыс әкімі Мұрат Ергешбаев құрылыс саласындағы компаниялардың басшыларымен кездесіп, өңірдегі инвестициялық жобалардың жүзеге асу барысын талқылады. Басқосуда жаңа өндірістерді белгіленген мерзімде іске қосу, инвесторларға қажетті жағдай жасау және құрылыс жұмыстарының сапасын қамтамасыз ету мәселелері қаралды.
Кездесуде сөз болған негізгі жобалардың бірі – «Roca Group» компаниясының өндірісі. Қазіргі таңда Қазақстандағы санитарлық-техникалық бұйымдардың басым бөлігі шетелден әкелінеді. Сондықтан отандық нарыққа қажетті өнімді ел ішінде шығаратын өндіріс орнының ашылуы құрылыс саласы үшін айрықша маңызға ие.
Өңір басшысы бұл жобаның артында бірнеше жылдық жүйелі жұмыстың тұрғанын атап өтті. Оның айтуынша, инвесторды Қызылорда облысына тарту жұмыстары 2024 жылдан бастап басталып, сол кездегі облыс әкімі Нұрлыбек Машбекұлының бастамасымен нақты келіссөздер жүргізілген.
Жобаның жалпы инвестициялық құны 40 млрд 700 млн теңгені құрайды. Өндіріс іске қосылған кезде 300 жаңа жұмыс орнын ашу жоспарланған. Бұл тек еңбек нарығына оң әсер етіп қоймай, өңірдегі өндірістік және құрылыс салаларының дамуына қосымша серпін береді.
Маусым айында «Roca Group» компаниясының санитарлық-техникалық бұйымдар шығаратын зауытының құрылысына капсула салу рәсімі өткен болатын. Ендігі міндет – басталған жобаны сапалы әрі уақытылы жүзеге асыру. Осы мақсатта облыс әкімдігі инвестормен тұрақты байланыс орнатып, туындаған мәселелерді жедел шешуге басымдық беріп отыр.
Инвестициялық жобаның өңір үшін тағы бір ерекшелігі – өндірілетін өнімді жергілікті құрылыс нысандарында кеңінен пайдалану мүмкіндігі. Қызылорда облысы «Roca Group» компаниясының Қазақстандағы жобасын қолдаған алғашқы өңірлердің бірі ретінде кәсіпорын өнімдерін ішкі нарыққа шығаруға қажетті жағдай қалыптастыруға ниетті.
Бұл бастама отандық құрылыс материалдарының үлесін арттыруға да ықпал етпек. Өйткені санитарлық-техникалық бұйымдар тұрғын үй, әлеуметтік нысандар, қонақүй, коммерциялық ғимараттар мен басқа да құрылыс жобалары үшін тұрақты қажет өнім саналады. Жергілікті жерде өндірістің жолға қойылуы тасымалдау шығынын азайтып, өнімді нарыққа жедел жеткізуге мүмкіндік береді.
Компания Қазақстан нарығындағы жұмысын өндіріс құрылысына дейін де бастап кеткен. Биыл жазда Алматы қаласында Орталық Азиядағы алғашқы шоу-румын ашты. Сонымен бірге Алматы мен Астана қалаларында дайын өнімдерді сақтауға арналған қоймалары бар.
Осылайша «Roca Group» жобасы бір ғана зауыт салумен шектелмей, Қазақстан нарығында өндіріс, сақтау және өткізу жүйесін қалыптастыруға бағытталған кешенді жобаға айналып отыр.
Өңір басшылығы үшін қазіргі кезеңдегі басты міндеттердің бірі – инвестордың жұмысын жеңілдетіп, жобаның белгіленген мерзімде іске қосылуына қажетті қолдауды қамтамасыз ету. Құрылыс компанияларымен кездесуде де осы мәселеге ерекше мән берілді.
Мұндай жобалардың өңір экономикасына әсері бірнеше бағыттан көрінеді. Біріншіден, жаңа жұмыс орындары ашылады. Екіншіден, құрылыс индустриясына қажетті өнімнің бір бөлігі ел ішінде өндіріледі. Үшіншіден, өндірістің айналасында логистика, қызмет көрсету және басқа да ілеспе салалардың дамуына мүмкіндік туады.
Мемлекет басшысының елде жаңа инвестициялық кезеңді бастау, заманауи өндірістерді көбейту жөніндегі тапсырмасы да осындай жобалардың маңызын арттыра түседі. Қызылорда облысында қолға алынған бастама осы бағыттағы жұмыстардың нақты нәтижелерінің біріне айналмақ.
Алдағы уақытта зауыттың құрылысы жоспарға сай жүріп, өндірістік қуаты іске қосылса, өңір ғана емес, тұтас Қазақстанның құрылыс индустриясы үшін жаңа мүмкіндік ашылады. Импортты алмастыратын өнімнің көлемі артып, отандық нарықтың қажеттілігін ішкі өндіріс есебінен өтеуге жол ашылады.
Инвесторға қолайлы орта қалыптастыру, жобаны уақытылы іске қосу және өндірілген өнімге ішкі нарықтан сұраныс қалыптастыру – осы жобаның табысты жүзеге асуының негізгі шарттары. Қызылорда үшін «Roca Group» жобасы жаңа жұмыс орындарымен қатар, өңірдің өндірістік әлеуетін танытатын ірі инвестициялық бастамалардың біріне айналғалы тұр.
