Түркістан облысында тұрғындарды тұрақты жұмыспен қамту, жаңа жұмыс орындарын ашу және еңбек нарығындағы мүмкіндіктерді кеңейту бағытындағы жұмыстар кезең-кезеңімен жүзеге асырылып келеді. Бұл бағыттағы шаралар Мемлекет басшысының халықтың әл-ауқатын арттыру және жұмыспен қамтуды қамтамасыз ету жөніндегі тапсырмаларына сәйкес жүргізілуде.
Өңірлік жұмыспен қамту картасы аясында биыл облыста 74 516 жұмыс орнын құру жоспарланған. 16 тамыздағы мәліметке сәйкес, оның 65 009-ы құрылып, жылдық жоспардың 87,2 пайызы орындалды. Бұл көрсеткіш облыста еңбек нарығын тұрақтандыруға бағытталған жұмыстардың қарқын алғанын көрсетеді.
Жұмыс орындарын ашу тек бір бағытпен шектелмейді. Өңірде ұлттық жобаларды іске асыру, бос жұмыс орындарына азаматтарды орналастыру, субсидияланатын жұмыс орындарын құру және жаңа кәсіпорындарды іске қосу арқылы халықты еңбекке тарту тетіктері қатар қолданылып отыр.
Ұлттық жобалар шеңберінде биыл 2 465 жұмыс орнын ашу көзделген. Қазіргі уақытта оның 2 072-сі құрылып, жоспардың 84,1 пайызы орындалды. Ал бос жұмыс орындары бойынша 40 595 орын белгіленсе, бүгінге дейін 30 770 азамат еңбекпен қамтылған. Осы бағыттағы көрсеткіш 75,8 пайызға жетті.
Түркістан облысы Мемлекет басшысының 10 мың тұрғынға 100 жаңа жұмыс орнын құру жөніндегі тапсырмасын орындауда да жоғары нәтиже көрсетті. Жылдық жоспарға енгізілген 11 476 жаңа жұмыс орнының барлығы құрылып, бұл бағыттағы көрсеткіш 100 пайызға орындалды.
Субсидияланатын жұмыс орындарын құру бойынша да межеден асып түскен нәтиже бар. Жыл басында 18 530 жұмыс орнын ашу жоспарланғанымен, 16 тамызға дейін 19 964 орын құрылды. Осылайша жоспар 107,7 пайызға орындалды.
Бұл ретте жұмыспен қамту саласындағы басты мақсат – статистикалық көрсеткіштерді көбейту ғана емес, тұрғындардың тұрақты табыс көзіне ие болуына жағдай жасау. Осыған байланысты облыста уақытша жұмыспен қамтудан бөлек, ұзақ мерзімді еңбекке орналастыруға басымдық беріліп отыр.
Жаңа жұмыс орындарының негізгі бөлігі инвестициялық жобаларды іске асыру, өндіріс орындарын ашу және кәсіпкерлік бастамаларды қолдау арқылы құрылмақ. Сондай-ақ жұмыс істеп тұрған кәсіпорындардың өндірістік қуатын арттыру есебінен қосымша еңбек орындарын көбейту көзделген.
Өңірдің экономикалық әлеуетін арттыруда шағын және орта бизнестің де маңызы зор. Кәсіпкерліктің дамуы жаңа өндірістердің пайда болуына ғана емес, жергілікті тұрғындарды тұрақты жұмыспен қамтуға мүмкіндік береді. Сондықтан жұмыспен қамту саясаты экономиканың нақты секторын дамыту шараларымен сабақтастырылып отыр.
Еңбек нарығында мамандарға деген сұраныстың өзгеруіне байланысты азаматтарды сұранысқа ие кәсіптерге бағыттау да маңызды міндеттердің бірі. Бұл өз кезегінде жұмыс іздеушілердің еңбек нарығына бейімделуіне және бос жұмыс орындарын тиімді толтыруға ықпал етеді.
Облыс бойынша жұмыспен қамту картасының орындалуы тұрақты бақылауда. Жауапты басқармалар мен аудан, қала әкімдіктеріне белгіленген көрсеткіштерді орындаумен қатар, құрылған жұмыс орындарының тұрақтылығын қамтамасыз ету міндеті қойылған.
Жыл соңына дейін өңірде жаңа кәсіпорындар мен инвестициялық жобаларды іске қосу, кәсіпкерлік бастамаларды қолдау және тұрғындарды тұрақты жұмысқа орналастыру бағытындағы жұмыстар жалғаспақ.
Түркістан облысында бүгінгі көрсеткіштер еңбек нарығындағы оң динамиканы аңғартады. Ең бастысы – құрылған әр жұмыс орны тұрғынның тұрақты табысына, отбасының әл-ауқатына және өңір экономикасының дамуына қызмет етуі тиіс. Сондықтан алдағы кезеңдегі негізгі міндет – сандық көрсеткіштермен қатар, жұмыс орындарының сапасы мен тұрақтылығын арттыру.
