Сайрам ауданында ауыл шаруашылығының маңызды бағыттарының бірі саналатын жеміс-жидек шаруашылығы жыл санап өркендеп келеді. Құнарлы жерді тиімді пайдаланып, бау-бақша көлемін ұлғайтуға ден қойған шаруалар бүгінде алма жинау науқанының қызған шағында. Еңбек маусымында шаруашылықтарда піскен өнімді ысырапсыз жинап, оны ішкі нарыққа жөнелту және ұзақ мерзімге сақтау жұмыстары қатар жүргізілуде.
Қазіргі таңда аудандағы жеміс-жидек бақтарының жалпы көлемі 1193 гектарға жеткен. Оның 429 гектарын алма бақтары құрайды. Бұл көрсеткіш ауданның жеміс өсіруге қолайлы аймақтардың бірі екенін аңғартады. Соңғы жылдары бау-бақша шаруашылығына заманауи технологияларды енгізуге басымдық беріліп, өнімділікті арттыруға бағытталған жұмыстар жүйелі түрде жүргізіліп келеді.
Алма жинау науқаны кезінде шаруалардың негізгі міндеті – піскен өнімді уақытылы жинап, сапасын сақтай отырып тұтынушыға жеткізу. Осыған байланысты аудандағы бірқатар ірі шаруашылықтарда жұмыс қарқыны артқан. Соның ішінде «Dala fruit.kz» ЖШС-нің 235 гектар және «Алмалы» АШӨК-нің 118 гектар алма бақтарында өнімділік жоғары деңгейде.
Шаруашылықтарда заманауи агротехнологиялардың қолданылуы өнім көлемін арттырып қана қоймай, жемістің сапасын сақтауға мүмкіндік беріп отыр. Бақтарды күтіп-баптау, суару, өсімдіктерді қорғау және өнімді жинау жұмыстарының талапқа сай ұйымдастырылуы шаруалардың еңбегін еселеп, сапалы өнім алуға жол ашуда.
Жеміс өсірудің өзіндік ерекшелігі бар. Бір жылдық еңбектің нәтижесі бірнеше айға созылатын жинау науқаны кезінде айқындалады. Сондықтан піскен алманы дер кезінде жинау, сұрыптау және сақтау орындарына жеткізу – шаруашылықтар үшін аса маңызды кезең. Бұл ретте Сайрам ауданындағы шаруалар өнімді жинаумен қатар, оны өткізу және сақтау мәселесіне де ерекше мән беріп отыр.
Жиналған алманың бір бөлігі күнделікті сұранысты қамтамасыз ету мақсатында ішкі нарыққа жөнелтіледі. Ал өнімнің қалған бөлігі арнайы сақтау қоймаларына жеткізіліп, маусымаралық кезеңде нарыққа шығаруға дайындалады. Ауданда жеміс-жидек өнімдерін сақтауға арналған заманауи талаптарға сай жабдықталған, сыйымдылығы 15 мың тонналық қойманың жұмыс істеуі осы бағыттағы мүмкіндікті кеңейтіп отыр.
Мұндай қоймалардың болуы шаруалар үшін маңызды. Өйткені өнімді жинағаннан кейін бірден өткізу қажеттілігі азайып, жемісті тиісті температуралық режимде сақтап, нарықтағы сұранысқа қарай кезең-кезеңімен саудаға шығаруға мүмкіндік туады. Бұл өз кезегінде өнімнің ысырап болуын азайтып, шаруашылықтардың экономикалық тиімділігін арттыруға ықпал етеді.
Сайрамдағы жеміс-жидек шаруашылығының дамуы тек ауыл шаруашылығы өнімінің көлемін арттырумен шектелмейді. Бақ шаруашылығының өркендеуі ауылдық жерлердегі еңбекпен қамтуға, жерді тиімді пайдалануға және өңірдің азық-түлік қорын толықтыруға да әсер етеді. Әсіресе алма секілді күнделікті тұтынатын өнімдердің жергілікті жерде өндіріліп, ішкі нарыққа тұрақты жеткізілуі маңызды.
Бүгінде шаруалар үшін өнімді өсірумен қатар, оны сақтау, сұрыптау, тасымалдау және өткізу тізбегін жолға қою өзекті болып отыр. Осы тұрғыдан алғанда, Сайрам ауданында өндірістен кейінгі инфрақұрылымды дамытуға да көңіл бөлініп келеді. Жеміс-жидек сақтау қоймаларының іске қосылуы мен заманауи технологиялардың енгізілуі – осы бағыттағы жұмыстардың нәтижесі.
Алма жинау науқанының қызған шағында бақтардағы еңбек те қыза түседі. Бір жерде піскен жемістер жиналса, енді бірінде олар сұрыпталып, жәшіктерге орналастырылып, сауда орындарына немесе сақтау қоймаларына жөнелтіледі. Мұның барлығы маусымдық өнімді тиімді пайдалануға бағытталған біртұтас жұмыстың құрамдас бөлігі.
Алдағы кезеңде ауданда жеміс-жидек шаруашылығын одан әрі дамыту, алма өндірісінің көлемін ұлғайту, жаңа технологияларды енгізу және өнімді сақтау мен өткізу мүмкіндіктерін кеңейту бағытындағы жұмыстар жалғасын табады.
Сайрамның бау-бақшаларындағы бүгінгі қарбалас – бірнеше айлық еңбектің нәтижесі. Жерге егілген көшетті баптап, одан мол өнім алу үшін шаруадан төзім мен табандылық қажет. Қазіргі таңда аудандағы шаруалардың еңбегі жемісін беріп, алма бақтарынан жиналған өнім ішкі нарыққа жол тартуда. Бұл ретте өндіріс көлемінің артуы мен сақтау мүмкіндіктерінің кеңеюі Сайрамның жеміс-жидек шаруашылығын жаңа деңгейге көтеруге мүмкіндік беріп отыр.
