Көкшетауда жаңғыртудан өткен теміржол вокзалы жолаушыларға қайта қызмет көрсете бастады. Бір жылдан астам уақыт жүргізілген жөндеу жұмыстарының нәтижесінде ғимараттың ішкі кеңістігі толық жаңартылып, жолаушыларға қолайлы жағдай жасалды. Ал вокзалдың қала тұрғындарына жақсы таныс тарихи сәулеттік келбеті сақталды.
Жаңартылған нысанның ашылу рәсіміне Ақмола облысының әкімі Марат Ахметжанов пен Қазақстан Республикасының Көлік вице-министрі Жәнібек Тайжанов қатысты. Іс-шара барысында өңірдегі теміржол инфрақұрылымын жаңғырту жұмыстарының нәтижесі таныстырылды.
1981 жылы салынған Көкшетау вокзалы соңғы жиырма жылдан астам уақыт ішінде күрделі жөндеуден өтпеген еді. Бүгінде ғимараттың қасбеті, ішкі бөлмелері, кіреберіс аумақтары мен инженерлік жүйелері жаңартылды. Күту залдары мен ақпараттық аймақтар қайта жабдықталып, жолаушыларға арналған қонақүй бөлмелері қарастырылды.
Нысанды жаңарту кезінде заманауи талаптармен қатар, тұрғындар үшін тарихи мәні бар сәулеттік ерекшеліктерді сақтау мәселесіне басымдық берілген. Осылайша, сыртқы келбеті бұрынғы қалпында қалғанымен, вокзалдың ішкі инфрақұрылымы жаңа деңгейге көтерілді.
Марат Ахметжанов теміржол инфрақұрылымын дамыту Мемлекет басшысы белгілеген маңызды міндеттердің бірі екенін атап өтті. Оның айтуынша, көлік нысандарын жаңарту ең алдымен халыққа қолайлы орта қалыптастыруға бағытталуы тиіс. Көкшетау вокзалы тәулігіне шамамен 1800 жолаушыға қызмет көрсетеді. Мұнда өңір тұрғындары еліміздің түрлі қалаларына жолға шығып, Көкшетауға келген қонақтар мен туристерді қарсы алады. Қала арқылы Бурабай курорттық аймағына бағытталған маңызды теміржол қатынасы өтетіндіктен, вокзалдың туристік маңызы да жоғары.
Жоба аясында мүмкіндігі шектеулі азаматтарға қолжетімді орта қалыптастырылып, лифттер мен эскалаторлар орнатылды. Платформаларға шығатын жерүсті өткелінде жұмыстар жалғасып жатыр. Сонымен бірге вокзал маңындағы 0,75 гектар аумақ абаттандырылып, жаяу жүргіншілер жолдары жасалды, көгалдандыру және жарықтандыру жұмыстары жүргізілді.
Көкшетаудағы нысанның жаңаруы Ақмола облысындағы ауқымды бағдарламаның қорытынды кезеңі болды. Бағдарлама барысында өңірдегі 16 теміржол нысаны жаңғыртылды. Олардың қатарында Щучинск, Атбасар, Ақкөл, Макинск, Есіл, Ерейментау және Державинск қалаларындағы, сондай-ақ бірқатар станциялар мен елді мекендердегі вокзалдар бар.
Жаңғыртудан өткен вокзал енді тарихи сипатын сақтай отырып, жолаушыларға заманауи талаптарға сай қызмет көрсететін болады. Бұл — өңірдегі теміржол инфрақұрылымын жаңарту бағытындағы ауқымды жұмыстың нақты нәтижелерінің бірі.
