Елдің тыныштығы, тұтастығы қашанда бірінші орында тұруы тиіс. Міне, бүгінгі күні осы талаптан шығып, шекара шебі күзетінде берік қамалға айналған қорған – «Қаратау» шекара бөлімшесі.
«Қаратау» шекара бөлімшесі – Қазақстанның оңтүстік шебін күзетіп тұрған сенімді тірек нүктелерінің бірі. Бұл бөлімше ҚР ҰҚК ШҚ Жамбыл облысы бойынша департаментінің Меркі ауданы бойынша шекара басқармасының құрамында. Тау арасындағы күрделі аймақта орналасқандықтан, мұндағы шекарашылардың қызметі ерекше шыдамдылық пен төзімділікті талап етеді.
Бөлімшенің бастығы – тәжірибесі мол, өз ісінің хас шебері капитан Дильмурат Дюсембаев. Ол көп жылдық қызмет жолында талай қиындықты еңсеріп, жас сарбаздарға үлгі болып келеді. Тәртіп пен талап – оның ұстанымы. Күн сайынғы нарядтарды нақты ұйымдастырып, әр бағыттағы шекара нарядының қызметін үйлестіріп отырады. Әр сарбаздың жауапкершілігі мен қырағылығына ерекше мән беріп, шекара қауіпсіздігін қамтамасыз етуге күш салады.
«Қаратау» бөлімшесінің аймағы – табиғаты әсем, бірақ, қызмет тұрғысынан күрделі тау бөктері. Тік жартастар мен ирелең жолдардан тұратын аумақтан өту оңай емес. Қыстың қары мен жаздың ортасында да шекара нарядтары тәулік бойы кезекшілікке шығып, Мемлекеттік шекара сызығын бақылауда ұстайды. Бұл өңірде инженерлік бөгеттер мен техникалық бақылау құралдары орнатылғанымен, табиғи жағдайдың қиындығы адамдардың өз қырағылығына арқа сүйеуді талап етеді.
Түнгі ауысым кезінде сарбаздар түнгі көру аспаптары мен байланыс құрылғыларын пайдаланып, әрбір қозғалысты мұқият бақылайды. Тау ішіндегі шағын соқпақтар мен жасырын өткелдер – олардың басты назарында. Кейде ауа райы күрт бұзылып, тұман басқан шақта шекарашының сергектігі сынға түседі. Бірақ, тәжірибелі офицерлер мен ұқыпты сарбаздар үшін мұндай жағдай – қалыпты жұмыс бөлігі.
Қызмет орнының шалғай орналасуы сарбаздардың рухын түсірмейді. Керісінше, бұл – олардың бірлігін арттырып, нағыз шекарашыға тән төзімділік пен жауапкершілікті шыңдайтын мектеп. Бөлімше жеке құрамы бос уақытында спортпен шұғылданып, әскери дайындықтарын жетілдіреді. Әрбірі Отан алдындағы борышын абыроймен атқаруды мақсат тұтады.
Тау ішіндегі бөлімшенің тұрмыстық жағдайы да жақсы жолға қойылған. Бөлімше бастығының қамқорлығының арқасында сарбаздар жылы, жарық казармада тұрады, асхана үздіксіз жұмыс істейді. Қажетті жабдықтармен қамтамасыз етілген. Осындай жағдай сарбаздардың моральдық-психологиялық күйіне оң әсер етіп, қызмет сапасын арттыруға мүмкіндік береді.
Тау бөктеріндегі тыныштықты сақтап тұрған бұл шекарашылардың еңбегі – көзге көрінбейтін, бірақ ел тыныштығының тірегі. «Қаратау» бөлімшесі – биікте тұрып, биік рухпен қызмет етудің айғағы.
