Қостанай облысында 2014 жылы басталған «Серпін» бағдарламасы пандемиядан кейін тоқтап қалып еді. Білім басқармасының баспасөз қызметі аталған жобаның биыл қайта басталып жатқанын мәлімдеді.
Қазір Қостанай колледждерінің үгіт-насихат бригадалары жастарға кәсіптік бағдар беру, солтүстікке оқуға шақыру мақсатымен еліміздің оңтүстік өңірлерін аралап жүр.
«Екінші ай қатарынан Алматы, Жамбыл, Түркістан, Қызылорда және Жетісу облыстарында кәсіптік бағдар беру жұмыстары жүргізіліп жатыр. 20-24 қаңтар аралығында құрамында колледж директорлары мен мұғалім мамандар бар үгіт-насихат бригадалары жұмысының бірінші толқыны өтті. Олар жұмыс тапшылығы бар өңірлерді аралап, 87 мектепте білім алып жатқан 7 мыңнан астам оқушымен кездесіп қайтты. 24 ақпанда кәсіптік бағдар беру топтары екінші сапарға аттанды. Олар бес күн ішінде Қызылорда облысы Қармақшы ауданына қарасты 23 мектепке, Алматы облысы Ұзынағаш ауданының 19 мектебіне, Қарасай ауданының 21 мектебіне, Түркістан облысы Бәйдібек ауданының, Жетісу облысы Ақсу, Сарқан, Алакөл аудандарының мектептеріне, Жамбыл облысы Жамбыл, Меркі, Талас, Жуалы аудандарындағы білім ошақтарына баруды жоспарлап отыр», дейді облыстық білім басқармасының баспасөз хатшысы Анна Лазарева.
2014 жылдан 2021 жылға дейін Қостанай облысындағы 10 колледжде Алматы, Оңтүстік Қазақстан, Жамбыл, Қызылорда, Маңғыстау облыстарынан ұзын саны 337 серпіндік жас кәсіби білім алып шыққан.
