Күнделікті тұтынатын ауызсуды сүзіп ішу – ақтаулықтар үшін өзекті мәселе. Ақтауда жақында бұл мәселе де өз шешімін тапқалы тұр. Атап айтқанда, жуырда «Ақтау теңіз порты» арнайы экономикалық аймағында су тазарту сүзгілерін шығаратын жаңа өндіріс орны ашылды. Жоба импортты алмастыруды, отандық өнім үлесін арттыруды мақсат еткен.
Бұл жобаны «Аква Фильтер» ЖШС жүзеге асыруда. Ол өндірістің жылдық қуаты 160 мың сүзгіш элементті құрайды. Жобаның құны – 100 миллион теңге, ал жоспарланған жылдық өндіріс көлемі 617,5 миллион теңгеге жетеді. Қазір кәсіпорында 15-тен астам жергілікті тұрғын тұрақты жұмыспен қамтылған.
Өндірісте пайдаланылатын негізгі шикізат та – отандық өнім. Полимерлік гранулалар Атыраудан жеткізіліп, Ақтауда өңделеді. Өндіріс орнының өнімі – сүзгіш элементтер тұрмыста, медицинада және мұнай-газ саласында қолданылады.
– Мемлекет басшысы Қасым-Жомарт Тоқаевтың отандық өндірушілерді қолдау мен инвесторларға қолайлы жағдай жасау бағытындағы саясатының нәтижесін сезініп отырмыз. Арнайы экономикалық аймақта кәсіпорындарға бірқатар салықтық жеңілдік қарастырылған. Бүгінде біздің кәсіпорын – өңірдегі су сүзгіш элементтерін шығаратын жалғыз өндіріс орны. Қуатымыз тәулігіне 4 мыңнан астам өнім шығаруға жетеді, – дейді «Аква Фильтер» ЖШС басшысы Амангелді Тасқымбаев.
Оның айтуынша, арнайы экономикалық аймақта кәсіпорындарға қолайлы жағдай жасалған. Арнайы экономикалық аймақ өз көкжиегін кеңейте түспек, яғни алдағы уақытта өндіріс көлемін ұлғайту жоспарланып отыр.
«Ақтау теңіз порты» АЭА» АҚ атқарушы директоры Гүлмира Әбішеваның айтуынша, аймақта басым қызмет түрлері кеңейтілген.
– Енді өңдеу өнеркәсібімен қатар туризм, ауыл және балық шаруашылығы, өзге де бағыттарда жаңа жобаларды жүзеге асыруға мүмкіндік бар. Биыл жалпы құны 158,6 миллиард теңгені құрайтын 16 инвестициялық жоба іске қосылады, – дейді Г.Әбішева.
Оның айтуынша, бұл 16 инвестициялық жоба іске қосылғанда 1800-ге жуық жаңа жұмыс орны ашылады екен. Қазір өнеркәсіп, логистика, туризм мен инфрақұрылым бағыттарындағы нысандарда құрылыс-монтаж жұмысы жүргізіліп, қажетті өндірістік жабдықтар кезең-кезеңімен жеткізіліп жатыр.
