Ұлттық құрылтайдың екінші отырысында Мемлекет басшысы Қасым-Жомарт Тоқаев тәулігіне 24 сағат жұмыс істейтін кітапханалар құру туралы бастама көтерген болатын. Бүгінде Алматы тәулік бойы жұмыс істейтін кітапханалар тәжірибесін белсенді түрде енгізіп отыр.
Қаланың екі кітапханасы – Жамбыл атындағы қалалық жасөспірімдер кітапханасы мен «Alatau Creative Hub» орталығының кітапханасы 2023 жылғы қыркүйек айынан бері оқырмандарды тәулік бойы қабылдап келеді. Қалалық мәдениет басқармасының мәліметінше, бұл әдістеме оқушылар, студенттер, магистранттар, сондай-ақ докторанттар арасында үлкен сұранысқа ие екенін. Осыған байланысты мегаполистің Абай даңғылы, 141 мекенжайында орналасқан тағы бір кітапханасы енді 24/7 режимінде жұмыс жасайды.
«Қазір Алматыда үш кітапхана оқырмандарды 24 сағат бойы қабылдайды. Кез келген адам өзіне ыңғайлы уақытта келе алады. Жаңа жұмыс форматы енгізілген соң, келушілер саны да артты. Нақтырақ айтсақ, 2023 жылғы қыркүйек айынан бері Жамбыл атындағы қалалық жасөспірімдер кітапханасына 27650 адам келсе, «Alatau Creative Hub» орталығының кітапханасы 28 мың оқырманға қызмет көрсеткен. Жалпы алматылықтар кітап оқығанды жақсы көреді. Тек қалалық кітапханалардағы көрсеткіштерге тоқталсақ, оқырмандар жыл сайын кем дегенде үш миллион рет келіп-кетеді», деп хабарлайды Алматы қаласының мәдениет басқармасы.
Алматыда 28 қалалық кітапхана жұмыс істейді. Олардың 95 па йызының материалдық-техникалық базасы мен кітап қоры жаңартылып, жайлы оқу залдары мен интернет-залдар пайда болды. Сондай-ақ Алматы кітапханашылары оқырмандарға қызмет көрсету сапасын арттыру мақсатында алғаш рет Оңтүстік Корея, Германия және Швейцариядағы үздік кітапханаларда тағылымдамадан өтіп келді.
