Алматыда мәслихаттың кезектен тыс XVIII сессиясы өтті.
Сессия барысында депутаттар мегаполистің бірқатар көшелеріне жаңа атаулар беру және қайта атау жөніндегі ұсынысты қолдады. Сонымен, Ю.К.Тимирязев көшесінен Ю.Гагарин даңғылының бір бөлігі Ермек Серкебаевтың есімімен, ал Әуезов ауданындағы Юбилейная көшесі Владимир Толоконниковтың есімімен аталатын болды. Бостандық және Түрксіб аудандарындағы екі көшеге Ескендір Хасанғалиев пен Юрий Померанцев есімдері берілді.
Ермек Серкебаев – Абай атындағы Қазақ мемлекеттік академиялық опера және балет театрының солисі болған, Қазақстанның халық әртісі. Ол көрнекті қазақстандық әнші, халық әндерін, романстарды, классикалық және кеңестік шығармалардағы басты опералық партияларды қазақ, орыс және басқа тілдерде орындаушы. Владимир Толоконников – Қазақстанның еңбек сіңірген әртісі, М. Лермонтов атындағы мемлекеттік академиялық орыс драма театрының актері болған, Алматыда қырықтан астам фильмге түскен. Ескендір Хасанғалиев – Қазақстанның халық әртісі, әнші және композитор, «Анаға сәлем» және «Гүлсезім» сияқты танымал әндердің авторы. Юрий Померанцев – Қазақстанның халық әртісі, актер, режиссер және педагог, «Біздің сүйікті дәрігер» фильмінің арқасында танымал болды.
Бұған дейін шешім жобасы республикалық ономастика комиссиясының қарауына жіберіліп, қаулы «Ашық НҚА» порталында ағымдағы жылдың 28 мамырына дейін талқыланды.
Мәслихат депутаттары «Алматы қаласы әкімдігінің персоналды құрамын келісу туралы» қалалық мәслихаттың 2022 жылғы 9 желтоқсандағы №199 шешіміне өзгерістер енгізу туралы шешім қабылдады. Бұдан басқа, қолданыстағы заңнама нормаларына сәйкес келтіру үшін мәслихаттың 2020 жылғы 9 қазандағы «Ауылшаруашылығы мақсатындағы пайдаланылмайтын жерлерге жер салығының базалық мөлшерлемесін арттыру туралы» №489 шешімінің күші жойылды деп тану жөнінде шешім қабылданды.
Еліміздің Салық Кодексінің 509-бабына сәйкес, жергілікті органдар пайдаланылмайтын ауылшаруашылығы жерлері үшін жер салығының базалық мөлшерлемесін 10 есеге дейін көтере алды. Алайда, 2020 жылғы 10 желтоқсаннан бастап ставканы 20 есеге арттыру жергілікті органдардың қосымша актілер қабылдауын қажет етпей, автоматты түрде жүзеге асырылады. Кодекстің жаңа редакциясында пайдаланылмайтын немесе мақсатсыз пайдаланылатын ауылшаруашылығы жерлеріне салынатын салықтың базалық мөлшерлемесі меншік иесіне немесе жер пайдаланушыға бұзушылықтарды жою туралы нұсқама берілгеннен кейін бірден 20 есеге ұлғаяды. Шешімнің бұл жобасы Алматы қаласы Қоғамдық кеңесінің, Алматы қаласы кәсіпкерлер палатасының «Атамекен» ҚР ҰКП отырысында қаралды. Ол ашық нормативтік құқықтық актілердің интернет-порталында орналастырылды және оған қатысты ескертулер мен ұсыныстар түскен жоқ.
