Жайық өзенінің су деңгейі қауіпті деңгейден 7 см асты, бірақ Оралға қауіп төніп тұрған жоқ. Батыс Қазақстан облыстық Төтенше жағдайлар департаменті бастығының міндетін атқарушы Руслан Қасыбаевтың айтуынша, саяжай тұрғындарын алдын ала ескерту жұмыстары жүргізіліп, барлығы қауіпсіз жерге шығарылған.
«Су көтерілгенде саяжайды күзетеміз деп қайтып барған азаматтар бар екені анықталды. Құтқару жұмыстары жүргізіліп, су басқан саяжайлардан адамдар шығарылды. Стеновик, 1, 2, 3-саяжайларда су деңгейі көтеріліп, апаттық құтқару жұмыстары жүргізіліп жатыр. Бір тікұшақ, он қайық, жеке құрамнан 230 жуық адам тартылды. Осы жұмыстардың арқасында Орал қаласына қауіп жоқ», деді спикер Орталық коммуникациялар қызметі алаңында өткен брифингте.
Бұл ретте Батыс Қазақстан облысы әкімінің орынбасары Қалияр Айтмұхамбетов эвакуациялаудан бас тартқан азаматтар мәжбүрлі түрде эвакуацияланатынын атап өтті. «Он эвакуациялық пункте 2360 адам орналасқан, әлі 2786 адамға орын бар. Онда барлық жағдай жасалған», деді спикер.
