Сыбайлас жемқорлық – мемлекет дамуына кедергі келтіріп қана қоймай, қоғамның әділдік пен заңдылыққа деген сенімін әлсірететін қауіпті құбылыс. Сондықтан оған қарсы күрес жүргізу мемлекеттік органдардың ғана емес, бүкіл қоғамның ортақ міндетіне айналып отыр. Бұл бағыттағы жұмыстар бүгінде еліміздің барлық өңірлерінде жүйелі түрде жүзеге асырылуда.
Осы орайда өткен сейсенбі күні Байзақ ауданы «AMANAT» партиясының аудандық филиалында «Сыбайлас жемқорлықсыз қоғам – әр азаматтың рөлі» тақырыбында маңызды кездесу өтті. Жиынға ауданға қарасты 17 ауылдық округтің әкімдері қатысып, қоғамдағы адалдық қағидаттарын нығайту, мемлекеттік қызметтің ашықтығын қамтамасыз ету және сыбайлас жемқорлықтың алдын алу мәселелерін талқылады.
Іс-шараны «Адал қоғам» қоғамдық бірлестігі ұйымдастырды. Кездесудің негізгі мақсаты – қоғамда жемқорлыққа қарсы мәдениетті қалыптастыру, мемлекеттік қызметтің тиімділігі мен ашықтығын арттыру, сондай-ақ азаматтардың құқықтық сауаттылығы мен жауапкершілігін күшейту болды.
Жиынға аудан әкімдігі ішкі саясат бөлімінің басшысы Айбек Әжібаев пен «Әділдік жолы» республикалық қоғамдық бірлестігінің Жамбыл облыстық филиалының жетекшісі Назима Дәрменқызы арнайы қатысып, өз ой-пікірлерін ортаға салды.
Кездесу барысында сыбайлас жемқорлықтың қоғамға тигізетін кері әсерлері, оны болдырмау жолдары және мемлекеттік қызметтегі ашықтықты қамтамасыз етудің маңыздылығы кеңінен талқыланды. Спикерлердің айтуынша, жемқорлыққа қарсы күресте құқық қорғау органдарының жұмысы ғана жеткіліксіз. Бұл ретте қоғамның белсенділігі мен азаматтардың жауапкершілігі ерекше рөл атқарады.
Өз сөзінде Назима Дәрменқызы әділ қоғам қалыптастыру жолындағы әр азаматтың жауапкершілігіне тоқталды.
– Қоғамның дамуы мен мемлекеттің өркендеуі ең алдымен заңның үстемдігіне байланысты. Егер әрбір азамат заң талаптарын сақтап, қоғамдық бақылауға белсенді қатысса, сыбайлас жемқорлықтың тамырына балта шабуға болады. Адалдық пен әділдік күнделікті өміріміздің басты қағидатына айналғанда ғана біз өркениетті қоғам қалыптастыра аламыз, – деді ол.
Кездесу барысында мемлекеттік қызметшілердің әдеп нормаларын сақтау мәселесіне де ерекше назар аударылды. Мемлекеттік қызметтің беделі әрбір қызметкердің кәсібилігі мен халық алдындағы жауапкершілігіне тікелей байланысты екені айтылды. Сонымен қатар тұрғындармен тиімді кері байланыс орнату, көрсетілетін мемлекеттік қызметтердің сапасын арттыру және олардың қолжетімділігін қамтамасыз ету жайы сөз болды.
Жиын барысында ауылдық округ әкімдері де өз ойларын ортаға салып, тәжірибелерімен бөлісті. Олар тұрғындардың сенімін нығайту, мемлекеттік бағдарламалардың орындалуын ашық жүргізу және қоғамдық бақылауды күшейту бағытында атқарылып жатқан жұмыстар жөнінде баяндады. Пікір алмасу алаңына айналған кездесуде қатысушылар өзекті мәселелерді талқылап, тиімді ұсыныстарын жеткізді.
Мамандардың айтуынша, сыбайлас жемқорлықтың алдын алуда түсіндіру жұмыстарының маңызы зор. Себебі құқықтық мәдениеті жоғары, заң талаптарын құрметтейтін қоғамда жемқорлыққа жол берілмейді. Сондықтан жастар арасында адалдық құндылықтарын дәріптеу, құқықтық сауаттылықты арттыру және қоғамдық бақылауды күшейту бағытындағы жұмыстар алдағы уақытта да жалғасын табады.
Жиын соңында қатысушылар сыбайлас жемқорлыққа қарсы күрес – мемлекеттің тұрақты дамуы мен халықтың әл-ауқатын арттырудың маңызды шарты екенін атап өтті. Сондай-ақ бұл бағыттағы жұмыстардың жүйелілігі мен сабақтастығын қамтамасыз ету қажеттігі айтылды.
Іс-шара барысында көтерілген мәселелер қоғамдағы адалдық қағидаттарын нығайтуға, мемлекеттік қызметтің ашықтығы мен тиімділігін арттыруға және азаматтардың құқықтық мәдениетін қалыптастыруға бағытталған маңызды қадамдардың бірі болды.
Адалдық пен әділдік үстемдік құрған қоғам ғана тұрақты дамуға қол жеткізе алады. Сондықтан сыбайлас жемқорлыққа қарсы күрес әр азаматтың күнделікті өмірлік ұстанымына айналуы тиіс.
