Қандай қоғамда да ауылшаруашылығы ең маңызды салалардың бірі болып табылады. Өйткені бұл сала ел экономикасының, халықтың әл-ауқатының, ел тұрғындарының тұрмыс деңгейінің артуында маңызды рөл атқарады. Яғни қоғамда асыраушы сала деп айтуға толық негіз бар.
Біздің ауданда бұл сала бойынша атқарылып жатқан жұмыстардың көрсеткіші жыл сайын едәуір жақсара түсуде. Аудан бойынша ауылшаруашылығының жалпы өнім көлемі 2022 жылдың үш айында 1068 млн теңгені құрады. Ауданда ірі қара 63484, қой-ешкі 175263, жылқы 8855, түйе 1381 және үй құстары 26606 басты құрап отыр.
Аудан бойынша үстіміздегі жылы 200 гектарға жаздық арпа, 1360 гектарға дәндік жүгері, 400 гектарға тары, 55 гектарға күнбағыс, 130 гектарға картоп, 190 гектарға көкөніс, 200 гектарға бақша дақылдары – жалпы 5644 гектар алқапқа ауылшаруашылығы дақылдары егіледі. Егістік суын алқаптарға үзбей жеткізу үшін 2021 жылы «Сқақ», «Богдан», «Сануй», «Сәтбай», «Ақалыс» тоғандары механикалық тазалаудан өткізілсе, ағымдағы жылы «Стандарт», «Сануй», «Сәтбай», «Ақалыс» тоғандары, барлығы 9,3 шақырым тазаланады. Өткен жылы аудан бойынша инвест субсидия арқылы төрт шаруа қожалығы жаңбырлатып суғару қондырғыларын алып, оның көмегімен 84 гектар егістік жерлерін игерді. Диқандар қауымына көктемгі дала жұмыстарын атқару үшін 65 тонна арзандатылған дизель отыны бөлініп, жанармайдың бағасы 1 литріне 201 теңге болып бекітілді.
1360 гектар алқапқа дәндік жүгерінің 27,2 тонна жүгері тұқымы қажет. Жүгерінің «Қаз3П-777», «Тұлпар -539», «Украинский» атты сорттарын Алматы облысы Еңбекшіқазақ ауданы Балтабай ауылы «Қазбудан» ЖШС-нен 1 килограмын 970 теңгеден алдық. 200 гектар алқапқа егетін жаздық арпаның 34 тонна тұқымының «Стекловидное» сұрыбының 1 килограмын 165 теңгеден, 29,4 тонна «Бәйшешек» тұқымының 1 килограмын 140 теңгеден Т.Рысқұлов ауданы, Құлан ауылы «Шәушен» АШТӨ сатып алынды. 424 гектарға егілетін көпжылдық шөп үшін 8,48 тонна тұқым қажет. Осы шөптің элиталық «Джулия» сортының 1 килограмын 2800 теңгеден, 1 сортты «Семиречинский» сортының 1 килограмын 1600 теңгеден Меркі ауданы Меркі ауылы «Абеир» шаруа қожалығынан алынды. 130 гектар алқапқа егілуге жоспарланған картоп үшін 455 тонна тұқым қамтамасыз етілді. Оның 1 класты «Гала», «Лотон» сұрыптарының 1 килограмын 145 теңгеден Алматы облысы, Қарасай ауданы, Үшқоңыр ауылы «Новое время» ЖШС-нен сатып алынды. 400 гектарға егілетін тары дақылының тұқымын жергілікті ауыл тұрғындары өздері дайындады. Сонымен қатар 6 тонна аммофос және 23 тонна аммиак селитра минералды тыңайтқыштарын алуға тапсырыс берілді.
2022-2023 жылдарға мал азығын дайындау бағытында нақты жоспарлар жасап, соған дайындық барысын ұдайы назарда ұстап келеміз.
Аудан көлемінде ауылшаруашылығына қолдау көрсете отырып, егісті жер көлемін ұлғайту, мал шаруашылығының өркендету бағытында жоспарлар бар. Мұндай игі жобаларды лайықты жүзеге асыру үшін бірінші кезекте билік өкілдері мен халық арасында өзара түсіністік, ынтымақ, бірлескен жұмыспен ортақ мақсат болу қажет. Осы ұстанымды берік ұстана отырып, алдағы уақытта да зор табыстарға қол жеткіземіз деген сенімдемін.
