Team Qazaqstan жобасының жетекшісі Олжас Сүлеймен:
«Ұлттық спорт түрлерінің ережелерін біріздендіріп, өтетін турнирлерді жүйелеу қажет. Мысалы, қазір апта сайын өңірлерде көкпар өтіп жатыр, оған мыңдаған адам қатысады. Бірақ нақты бір ережесі жоқ. Қауіпсіздік шарттары да ескерілмейді. Осы орайда бір-екі қайғылы жағдай да болған. Сондықтан осы спорт түрінің ережелерін, турнирлерді өткізу шарттарын бір арнаға салған жөн. Бұл бір жағынан ұлттық спорт түрлерінің қарқынды дамуына септігін тигізіп, жаңа деңгейге көтереді».
Ұлттық құрылтай мүшесі, құқыққорғаушы Айгүл Орынбек:
«Соңғы кездері жалған қайырымдылық ұйымдары көбейіп кетті. Кейбір қайырымдылық қорларының қандай мақсатта құрылғаны белгісіз, басшылары да көрсетілмеген. Дүкендер мен сауда сөрелеріндегі қайырымдылыққа деп қойылған жәшіктердің саны көп. Оларға салынған қаржының сұрауы жоқ. Бұл күмән тудырады».
Қолданбалы экономика зерттеулері орталығының ғылыми жетекшісі Жақсыбек Құлекеев:
«Дәл қазіргі таңда мемлекеттің кіріс бөлігін ұлғайту мақсатында еліміздің салық саясатын жетілдіру міндеті тұр. Бюджет – кез келген мемлекеттің ажырамас бөлігі, оның негізгі атрибуты. Егер бюджетке неғұрлым көбірек қаражат түсетін болса, онда соғұрлым мемлекеттің әлеуметтік экономикалық мәселелерді шешу әлеуеті арта түсетіні баршаңызға мәлім. Өкінішке қарай, Қазақстанда соңғы жылдары бюджетке түсетін салық көлемі жалпы ішкі өніммен салыстырғанда төмендеп бара жатыр. Жалпы, мен Үкіметтің салық және бюджет реформасына байланысты жоспарлап отырған іс-әрекетін қолдаймын».
