Өңірді көгалдандыруға қоғам болып атсалысты

0 4

Қоршаған ортаны қорғау, елді мекендерді көгалдандыру және экологиялық мәдениетті қалыптастыру – бүгінгі күннің маңызды міндеттерінің бірі. Осы бағыттағы жұмыстарды жандандыру мақсатында Қызылорда облысында «Таза Қазақстан» жалпыұлттық бастамасы аясында «Болашақ үшін ағаш отырғызайық» атты экологиялық акция ұйымдастырылды.

Игі шараға облыс әкімі Мұрат Ергешбаев қатысып, өңірді көгалдандыруға бағытталған бастаманың маңыздылығын көрсетті. Акцияға сондай-ақ облыс әкімінің орынбасарлары, облыс әкімі аппаратының басшысы, қала әкімі, облыстық басқармалардың жетекшілері, Қорқыт Ата атындағы Қызылорда университетінің өкілдері мен «Әділет» партиясы филиалының еріктілері қатысты. Жалпы, табиғатты қорғау шарасына 150-ден астам адам атсалысты.

Қатысушылар қала аумағына 275 түп ағаш көшетін отырғызды. Оның ішінде 25-і арша болса, 250-і – терек. Жасыл желек санын көбейту арқылы қала экологиясын жақсарту, ауаның сапасын арттыру және тұрғындарға қолайлы орта қалыптастыру көзделген.

«Болашақ үшін ағаш отырғызайық» акциясы тек көшет отырғызу шарасымен шектелмейді. Оның негізгі мәні – қоғамда табиғатқа жанашырлық көзқарас қалыптастырып, қоршаған ортаны қорғауға әр азаматтың жауапкершілікпен қарауына ықпал ету. Өйткені бүгін отырғызылған әрбір ағаш – ертеңгі ұрпаққа қалатын экологиялық мұра.

Бұл бағыттағы жұмыстар облыс орталығымен ғана шектелмей, барлық ауданда жалғасын тапты. Жалпы акция аясындағы көгалдандыру шараларына 9163 адам қатысып, 5875 түп көшет отырғызған. Бұл – өңір тұрғындарының қоршаған ортаны жақсартуға деген ортақ ұмтылысын көрсететін маңызды көрсеткіш.

«Таза Қазақстан» бастамасы аясында жүзеге асырылып жатқан мұндай шаралар елді мекендердің көркін арттырып қана қоймай, табиғи ресурстарды сақтауға және экологиялық сауаттылықты дамытуға бағытталған. Әсіресе, жастар мен еріктілердің белсенді қатысуы табиғатты қорғау мәдениетінің келер ұрпақ арасында да қалыптасуына жол ашады.

Жалпы, Қызылорда облысында көгалдандыру жұмыстарына қоғам өкілдерінің кеңінен тартылуы – қоршаған ортаны қорғау ісіндегі ортақ жауапкершіліктің көрінісі. Ендігі маңызды міндет – отырғызылған көшеттерді күтіп-баптап, олардың жерсінуін қамтамасыз ету. Себебі жасыл желекті көбейту ғана емес, оны сақтап, келешекке жеткізу де үлкен еңбек пен жүйелі жұмысты талап етеді.