Қызылордалық Мақсат Таев үшін әскери қызметтегі еңбек жолының аяқталуы жаңа кезеңнің басталуына себеп болды. Қарулы күштер қатарындағы қызметін 2020 жылы аяқтаған ол зейнетке шыққан соң тыныш өмірді емес, өз кәсібін бастауды таңдады. Бүгінде кезінде шағын шеберханадан басталған іс жиһаз өндірісіне айналып, жиырмадан астам адамды тұрақты жұмыспен қамтып отыр.
Әскери салада жинаған тәжірибесі кәсіпкерге жаңа бағытта да көп көмегін тигізді. Тәртіп, жауапкершілік, жоспарлы жұмыс пен бастаған істі соңына дейін жеткізу қағидаларын ол кәсіпкерлікке де арқау етті. Алайда жаңа саланы меңгеру үшін білім қажет болды. Осы мақсатта Мақсат Таев «Атамекен» кәсіпкерлер палатасының «Бастау-Бизнес» жобасы бойынша оқып, бизнес жүргізудің негіздерін үйренді.
Кәсіп бастамас бұрын нарықты зерттеуге ерекше көңіл бөлді. Қызылордада қандай тауарға сұраныс барын саралап, жиһаз өндірісіне тоқталды. Бизнес-жоспарын әзірлеп, оны сәтті қорғаған соң 530 мың теңге көлемінде қайтарымсыз грантқа қол жеткізді.
«Әскери қызметтен кейін бос отырмай, өзіме де, өзгеге де пайдасы тиетін кәсіппен айналысқым келді. Нарықты зерттей келе, жиһаз өндірісіне сұраныстың бар екенін байқадым. Алғашқыда грант қаражатына лазерлік станок алуды ойлағанмын. Кейін өндіріс үшін сандық бағдарламамен басқарылатын станоктың тиімді екенін түсіндім», – дейді кәсіпкер.
Осылайша шағын өндірістің алғашқы қадамы жасалды. Бастапқыда кәсіпкер уақытша салынған шағын ғимаратта бес-алты адаммен бірге жұмыс істеді. Алғашқы кезең оңай болған жоқ. Құрал-жабдықтың мүмкіндігі шектеулі, тапсырыс көлемі аз болды. Соған қарамастан сапалы өнім шығаруға және тұтынушылар сенімін қалыптастыруға басымдық берілді.
Уақыт өте келе тұрақты тапсырыс берушілер көбейіп, өндірістің де аясы кеңейді. Жаңа жабдықтар алынды, өнім түрлері артты. Бірнеше жылдан кейін шағын шеберхана толыққанды жиһаз өндіретін кәсіпорынға айналды.
Бұл ретте мемлекеттік қолдаудың да маңызы аз болған жоқ. Кәсіпкер кәсіпкерлікті дамытуға арналған бағдарламалар аясында «Даму» қоры арқылы 5 миллион теңге көлемінде субсидиялық қолдауға ие болды. Кейінгі екі жылда өндірісті дамытуға бағытталған қаржыландыру көлемі 40 миллион теңгеге жеткен. Қаржы жаңа жабдықтар алуға, өндіріс қуатын арттыруға және тапсырыстар көлемін көбейтуге бағытталды.
Бүгінде кәсіпорын «Ади Мебель» брендімен жұмыс істейді. Мұнда жиһаз дайын үлгімен ғана емес, тапсырыс берушінің қалауына қарай жеке жоба негізінде жасалады. Клиент материалдың түрін, түсін, дизайнын және жиһаздың өлшемін таңдай алады. Мамандар тапсырыс берушінің үйі мен кеңсесінің ерекшелігін ескере отырып, бұйымның жобасын әзірлейді.
Өндіріс орнында дизайнерлер, жиһаз құрастырушылар мен басқа да мамандар еңбек етеді. Қазір кәсіпорында 20-дан астам адам тұрақты жұмыспен қамтылған. Кәсіпкер үшін бұл – өндіріс көлемінің көрсеткіші ғана емес, жергілікті тұрғындарға жасалған мүмкіндік.
«Біз үшін жиһаз шығару ғана емес, оның сапасы мен тұтынушының көңілінен шығуы маңызды. Сонымен бірге жергілікті тұрғындарға жұмыс орындарын ашуға тырысамыз. Өндіріс көлемі артқан сайын еңбек ұжымын да кеңейтуді жоспарлап отырмыз», – дейді Мақсат Таев.
Кәсіпорын өнім сапасына ерекше мән береді. Жиһаз өндірісінде қолданылатын материалдардың бір бөлігі Ресейден жеткізіледі. Ал фурнитура мен жекелеген бөлшектер Германия, Австрия және Италиядан әкелінеді. Сапалы шикізатты заманауи құрал-жабдықтармен үйлестіру кәсіпорынға күрделі тапсырыстарды да орындауға мүмкіндік беріп отыр.
Қызылордада орналасқан өндірістің тапсырыс географиясы да кеңейген. Кәсіпорын өнімдеріне Шымкент, Алматы және Астана қалаларынан сұраныс түседі. Бұл – жергілікті жерде өндірілген өнімнің бәсекеге қабілеттілігін көрсететін факторлардың бірі.
Тұтынушы үшін тағы бір қолайлы мүмкіндік – жиһазды дайын каталогтан таңдап қана қоймай, оны өз қалауынша жобалау. Тапсырыс беруші кәсіпорынға келіп, жиһаз үлгілерімен танысады, қажетті материалдарды таңдайды. Одан кейін мамандармен бірге бұйымның дизайны мен өлшемдері нақтыланады.
Кәсіпкер енді өндірісті одан әрі кеңейтуді көздеп отыр. Оның айтуынша, басты мақсаттардың бірі – жеке өндірістік ғимарат салу, жаңа технологияларды енгізу және кәсіпорынның қуатын арттыру. Ал ұзақ мерзімді жоспарда жұмыс орындарының санын едәуір көбейту бар.
«Бастапқыда бес-алты адаммен бастадық. Қазір ұжымымыз жиырмадан асты. Алдымызда бұдан да үлкен жоспарлар бар. Жеке өндірістік ғимарат салып, жаңа технологияларды енгізсек, жұмыс орындарын көбейтуге мүмкіндік туады. Болашақта 200 адамға дейін тұрақты жұмыспен қамту жоспары бар», – дейді кәсіпкер.
Мақсат Таевтың еңбек жолы бір кәсіптің тарихымен ғана шектелмейді. Оның мысалынан адамның бір саладағы тәжірибесін жаңа бағытта тиімді пайдалануға болатынын көруге болады. Әскери қызметте қалыптасқан тәртіп пен жауапкершілік кәсіпкерлікке келгенде де қажет қасиеттерге айналған.
Ең бастысы, кәсіпкер өз кәсібін бастау кезінде мемлекеттік қолдау мүмкіндіктерін пайдаланып, алған қаражатын өндірісті дамытуға бағыттаған. 530 мың теңгелік гранттан басталған шағын жоба бірнеше жыл ішінде тұрақты өндіріс пен жиырмадан астам жұмыс орнына негіз болды.
Бүгінде «Ади Мебель» – Қызылордада өз тұтынушысын қалыптастырған өндіріс орындарының бірі. Кәсіпорынның алдағы мақсаты – өндіріс көлемін ұлғайтып, өнім түрін көбейту және жаңа жұмыс орындарын ашу.
Шағын кәсіптің үлкен өндіріске айналуы бір күнде жүзеге аспайды. Оның артында нарықты зерттеу, дұрыс шешім қабылдау, тәуекелге бару, еңбектену және мүмкіндікті тиімді пайдалану тұр. Мақсат Таевтың кәсіпкерлік жолы осының нақты көрінісі. Әскери қызметтен кейін жаңа кәсіп бастауға бел буған азамат бүгінде өз кәсібін дамытып қана қоймай, өзгелерге де жұмыс беріп, өңір экономикасына өз үлесін қосып келеді.
