Қызмет бабында жүріп қаза тапқан қарағандылық құтқарушы Хайрат Хали Президент Жарлығымен «Ерлігі үшін» медалімен марапатталды. Мәртебелі марапатты облыс әкімі Ермағанбет Бөлекпаев қаза тапқан өрт сөндірушінің туған-туыстарына табыс етті.
Қарқаралы ауданындағы дала өртін сөндіру кезінде Саран қаласындағы №24 өрт сөндіру бөлімінің аға өрт сөндіруші-құтқарушысы Хайрат қаза болған еді. 1991 жылы туған сержант азаматтық қорғау органында 2014 жылдан бастап жұмыс істеп келген.
«Хайрат Халидың өртті сөндіру кезінде көрсеткен ерлігі – нағыз батылдық пен жанқиярлықтың үлгісі. Ол өз өмірін адамдарға қызмет етуге және туған жерін қорғауға арнады. Халидың жақындарының қайғыларына ортақпыз. Әлбетте, біздің сөзіміз бен қолдауымыз отбасына ардақты ұлды, аяулы әкені қайтара алмайды. Тілсіз жаумен күрес кезінде табанды қызмет қылып, қыршын кеткен батырдың есімі ешқашан ұмытылмайды», деді Ермағанбет Қабдулаұлы.
Мемлекеттік награданы табыс ету рәсіміне құтқарушының әріптестері қатысты.
– Ел Президентіне біздің батыр әріптесімізді марапаттағаны үшін алғыс айтамыз. Хали Хайрат өзінің онжылдық қызметі барысында қашанда мамандыққа адалдығын көрсетті. Оның жүректілігінің арқасында бірнеше жан қатерден арашаланып қалды, – деді облыстық Төтенше жағдайлар департаментінің бастығы Марғұлан Аманбаев.
Саран қаласындағы өрт сөндіру бөлімінің бастығы Марғұлан Ысқақов Хайрат қаза тапқан қайғылы оқиғаның қалай өрбігені туралы баяндады. Хайрат пен тағы үш құтқарушы сол күні дала аумағын күзетуге шығады. Далада өрт ошағын кезіктірген олар оны дереу сөндіруге кіріседі. Болжам бойынша, сол сәтте желдің бағыты өзгерген.
– Жігіттер оқиға орнына жетіп, бізге не болып жатқанын хабарлап отырды. Хайраттың соңғы айтқан сөзі: «Бәрі дұрыс, уайымдамаңыздар» еді… Бірақ тосын табиғаттың кесірінен есіл ер қызметтік міндетін атқару барысында қапияда мерт болды, – деді М.Ысқақов.
Марқұмның жақындары «қайғылы сәтте қасымыздан табылып, есімін құрметтеп, «Ерлігі үшін» медалін тарту етіп жатқандарыңызға ерекше алғысымызды білдіреміз», деді.
«Отбасында төрт баланың екіншісі еді. Бала күнінен құтқарушы болуды мақсат тұтты, адамдарға көмектесіп, қоғамға пайдасын тигізгенді жақсы көретін. Өрт сөндіру бөлімінде 10 жылға жуық жұмыс істеді. Оның ерлігі – өмірдегі қалған ізі», дейді марқұмның әпкесі Бибігүл Хамитқызы.
