Қазір шаруалардың жаз бойы күтіп-баптап өсіргендерін жинап, еңбек жемісіне кенелетін берекелі де, мерекелі шақ. Сондықтан қант қызылшасын өсіруге ден қойған алакөлдік диқандар күздің әр күнін қалт жібермей, науқандық жұмыстарға қауырт іске кіріскен.
Аудандағы 7 ауылдық округтегі 15 шаруа қожалығы қант қызылшасын өсірумен айналысады. Биылғы жылы аудан бойынша 644 гектар алқапқа тәтті түбір егілді. Бүгінде 131 гектардан 3964 тонна өнім жиналып, әр гектарынан 302 центнерден айналды. 3291 тонна өнім Ақсу ауданындағы қант зауытына өткізілді. Бүгінде, тәтті түбір жинауды «Bolat group LTD» ЖШС-і және «Самет Агро» шаруа қожалықтары бастап кетті.
Аудан басшысы өнім жинау науқанына қызу кіріскен «Bolat group LTD» ЖШС-нің қант қызылшасы алқабына барып қайтты. Шаруа иесі биыл тамшылатып суару технологиясын пайдалана отырып, 275 гектар алқапқа тәтті түбір тұқымын сеуіп, 5 гектар алқаптан 350 тонна өнім алды. Түсім көз қуантады. Жиын-терін оң нәтиже берсе, келесі жылы 1000 гектар алқапқа қызылша сеуіп, өнім көлемін молайтуды көздеп отыр.
Жалпы қант қызылшасы бабы мен күтімі келіссе мол өнім беретін өсімтал әрі табысты дақыл. Мұны қызылша өсіруден мол тәжірибе жинақтаған Көлбай ауылындағы «Самет Агро» шаруа қожалығы да жақсы біледі. Қожалық ауданымыздың негізгі басымдықтарының бірі – қант қызылшасын 118 гектар алқапқа өсіріп, 75 гектардан 1847 тонна өнім жинады.
Аудан шаруалары үшін ауа райының көмегі, егістікті жаңбырлатып, тамшылатып суару арқылы суды үнемді пайдаланудың арқасында қызылшаның шығымы жақсы болды. Ендігі мақсат – алажаздай күтіп-баптаған өнімді күздің қара суығына, жауын-шашынға ұрындырмай сапалы жинап алып, тиісті қант зауыттарына өткізу болып отыр. Бұл жұмыстарға 5 комбайн жұмылдырылды.
Аудан әкімі шаруа қожалық иелерімен жүздесіп, қызыл қырманның қызған шағында мол өнім алуларына тілектес екенін жеткізді.
