Маңғыстау облысында баспана сапасын жақсарту және ескі тұрғын үйлер мәселесін шешу бағытында ауқымды жұмыс қолға алынды. Жақында «Реновация» бағдарламасы шеңберінде төрт елді мекенде жаңа тұрғын үйлердің құрылысы басталды. Жоба өңірдегі тұрғын үй қорын кезең-кезеңімен жаңартып, халықтың қауіпсіз әрі қолайлы ортада өмір сүруіне жағдай жасауға бағытталған.
Құрылыс жұмыстары Жаңаөзен қаласында, Боранқұл, Маңғыстау және Мұнайшы ауылдарында жүргізіледі. Қарақия ауданының Мұнайшы ауылында өткен рәсімге облыс әкімі Нұрдәулет Қилыбай қатысып, құрылыс алаңында арнайы капсула салу рәсімі өтті. Жергілікті тұрғындар үшін бұл бастама көптен күткен тұрғын үй мәселесін шешуге деген үмітті арттырды.
Өңірдегі тұрғын үй қорының жай-күйі жаңарту жұмыстарының қажеттігін көрсетіп отыр. Ресми мәлімет бойынша, облыста 64 үй апатты жағдайда деп танылған. Бұл ғимараттарда орналасқан 1061 пәтердің тұрғындары үшін қауіпсіз баспана мәселесі өзекті болып қала береді. Осыған байланысты мемлекеттік-жекеменшік әріптестік тетігі арқылы шамамен 54 тұрғын үй салу көзделген. Жоспарға сәйкес, жаңа жобалар аясында 1012 пәтерді пайдалануға беру қарастырылған.
Облыс әкімі құрылыс басталған нысандардың сапасына ерекше назар аудару қажеттігін атап өтті. Нұрдәулет Қилыбай жауапты органдар мен мердігерлерге жұмысты белгіленген мерзімде аяқтап, құрылыс талаптарының сақталуын қамтамасыз етуді тапсырды. Өйткені тұрғын үйді жаңарту тек жаңа ғимарат тұрғызумен шектелмей, азаматтардың қауіпсіздігі мен тұрмыс сапасын жақсартуға бағытталуы тиіс.
Мұнайшы ауылының ардагерлер кеңесінің төрағасы Ерғали Жақсылықов та жаңа құрылыс жұмыстарының ауыл үшін маңызын атап өтті. Тұрғындар игі бастамаға қолдау білдіріп, жаңа үйлердің пайдалануға берілуін асыға күтетіндерін жеткізді.
Жоба толық іске асқан жағдайда өңірдегі апатты тұрғын үй мәселесін азайтуға, елді мекендердің инфрақұрылымын жаңартуға және тұрғындардың баспана жағдайын жақсартуға мүмкіндік туады. Ендігі міндет – басталған құрылысты сапалы жүргізіп, жоспарланған пәтерлерді тұрғындарға қолданысқа дайын күйінде ұсыну.
