Ақтөбе облысында құрылыс индустриясының дамуына серпін беретін жаңа өндірістік нысан пайдалануға берілді. Заманауи технологиялармен жабдықталған кәсіпорын алюминийден жасалған терезе, есік және витраж жүйелерін шығаруға маманданған. Жаңа кешен өңірдегі өндірістік әлеуетті арттырып қана қоймай, құрылыс нарығын отандық өніммен қамтамасыз етуге мүмкіндік береді.
Кәсіпорынның салтанатты ашылу рәсіміне облыс әкімінің орынбасары Абзал Әбдікәрімов қатысты. Ол өндіріс орнын аралап, технологиялық жабдықтардың мүмкіндіктерімен және жұмыс үдерісінің ұйымдастырылуымен танысты. Сонымен қатар жиынға кәсіпкерлер, Қазақстанның бірнеше өңірінен келген құрылыс компанияларының өкілдері мен сәулетшілер қатысып, жаңа өндіріс орнының әлеуетіне назар аударды.
Ашылу рәсімінде сөз алған облыс әкімінің орынбасары өңдеу өнеркәсібі аймақ экономикасының тұрақты дамуына ықпал ететін маңызды салалардың бірі екенін атап өтті. Оның айтуынша, өндіріс орындарының көбеюі жергілікті экономиканың мүмкіндігін кеңейтіп, инвестициялық тартымдылықты арттыруға жол ашады. Осы ретте жаңа кәсіпорындардың іске қосылуы, отандық өндірісті қолдау және жергілікті өнімнің бәсекеге қабілеттілігін күшейту аймақ үшін стратегиялық маңызға ие.
Жалпы аумағы 3200 шаршы метрді алып жатқан өндірістік кешен заманауи жабдықтармен жарақтандырылған. Мұнда алюминий профильдерінен әртүрлі мақсаттағы терезелер, есіктер және витраж конструкциялары дайындалады. Өндірістің басты ерекшелігі – жұмыстың бірнеше кезеңін бір алаңда жүзеге асыруға мүмкіндік беретін толық технологиялық жүйенің қалыптасуы.
Атап айтқанда, дайын өнімді әзірлеу үдерісі бастапқы есептеу мен жобалаудан басталып, бояу, арнайы станоктарда жоғары дәлдікпен өңдеу, бөлшектерді құрастыру және қаптау кезеңдерімен жалғасады. Мұндай өндірістік тәсіл өнім сапасын бақылауға, тапсырыстарды жүйелі орындауға және тұтынушылардың сұранысына сай конструкциялар әзірлеуге жағдай жасайды.
Жаңа кешеннің іске қосылуы Ақтөбе облысындағы құрылыс материалдарын өндіру бағытын дамытуға қосылған тағы бір қадам. Кәсіпорынның өндірістік мүмкіндіктері алдағы уақытта жергілікті құрылыс нарығындағы сұранысты өтеуге және өзге өңірлермен іскерлік байланыстарды нығайтуға негіз болмақ.
Отандық өндірісті өркендету, заманауи технологияларды енгізу және өңірдің өнеркәсіптік әлеуетін күшейту – экономиканы әртараптандыру жолындағы маңызды міндеттердің бірі. Жаңа өндіріс орны осы бағыттағы жұмыстардың нақты нәтижелерінің бірі ретінде бағаланады.