Ақтөбе қаласында қысқы спорт түрлерін дамытуға бағытталған айтулы жарыс өтті. Өңір тарихында тұңғыш рет шаңғы роллерінен «FIS Roller Ski Asian Cup» халықаралық кубогы ұйымдастырылып, Азия елдерінің спортшылары бір алаңда бас қосты. Байрақты бәсеке Қысқы спорт түрлерінен облыстық балалар-жасөспірімдер спорт мектебінің базасында өтіп, шаңғы спортына қызығушылықты арттыруға тың серпін берді.
Халықаралық додаға Қазақстан, Таиланд және Моңғолиядан барлығы 131 спортшы қатысты. Қазақстанның намысын 120 спортшы қорғаса, Таиландтан 8, Моңғолиядан 3 спортшы жарыс жолына шықты. Қатысушылар екі күн бойы түрлі қашықтықта бақ сынап, жылдамдық пен төзімділікті, сонымен қатар жарыс тактикасын сынға салды.
Шаңғы роллері – қар жамылғысы жоқ кезеңде шаңғышылардың спорттық бабын сақтап, шеберлігін шыңдауына мүмкіндік беретін маңызды дайындық құралы. Сондықтан мұндай жарыстардың жазғы маусымда ұйымдастырылуы спортшылар үшін үлкен тәжірибе алаңы саналады. Әсіресе халықаралық деңгейдегі додаға қатысу жас спортшылардың өз мүмкіндігін бағалап, мықты қарсыластармен иық тіресе жарысуына жол ашады.
Ақтөбеде өткен кубок бәсекесі де тартысты сәттерге толы болды. Спортшылар жарыс жолында жоғары қарқын көрсетіп, мәреге жету үшін бар күшін салды. Екі күнге созылған сайыстың қорытындысы бойынша қазақстандық спортшылар бірнеше жүлделі орынға ие болып, ел намысын абыроймен қорғады. Ерлер арасындағы 15 шақырымдық қашықтықта жеңіс тұғырынан үш бірдей қазақстандық спортшы көрінді. Бірінші орынды Амиргали Муратбеков иеленсе, екінші орынға Дастан Калибеков жайғасты. Ал үздік үштікті Дидар Касенов түйіндеді. Осылайша ерлер арасындағы басты жүлделер толықтай Қазақстан құрамасының еншісінде қалды.
Әйелдер арасындағы 10 шақырымдық жарыста да отандастарымыз дараланды. Бірінші орынға Анна Мельник көтерілді. Екінші орынды Елизавета Толмачева иеленсе, үшінші орын Дарья Ковалеваның еншісінде қалды. Бұл нәтиже қазақстандық шаңғышылардың дайындық деңгейі жоғары екенін тағы бір мәрте көрсетті.
«FIS Roller Ski Asian Cup» жарысының Ақтөбеде алғаш рет өтуі өңірдің спорттық әлеуетін танытумен қатар, қысқы спорт түрлерін дамытуға жаңа мүмкіндіктер ашып отыр. Жазғы уақытта шаңғы роллерінен жарыстар өткізу спортшылардың маусымаралық дайындығын жетілдіруге, ал қыс мезгілінде жоғары нәтижелерге қол жеткізуге негіз қалыптастырады.
Халықаралық жарыстың өтуі жергілікті жанкүйерлер үшін де ерекше оқиға болды. Себебі Ақтөбеде әр жылдары спорттың түрлі бағыттары бойынша республикалық және халықаралық додалар ұйымдастырылып келеді. Енді олардың қатарына шаңғы роллерінен өтетін халықаралық бәсеке де қосылды.
Екі күндік тартыс мәресіне жетіп, жеңімпаздар анықталғанымен, жарыстың мәні жүлде мен медальдан әлдеқайда ауқымды. Мұндай бәсекелер спортшыларға тәжірибе жинақтап, кәсіби шеберлігін арттыруға мүмкіндік берсе, өңір үшін спорттық дәстүрді нығайтып, жастарды белсенді өмір салтына баулудың тиімді жолына айналады.
Ақтөбеде тұңғыш рет ұйымдастырылған «FIS Roller Ski Asian Cup» осылайша жоғары деңгейдегі спорт додасы ретінде есте қалды. Қазақстандық спортшылардың ерлер және әйелдер арасындағы басты жүлделерді толық иеленуі де ел құрамасының әлеуетін айқындады. Ең бастысы, халықаралық жарыс Ақтөбе өңірінде қысқы спорт түрлерін дамытуға жаңа тыныс беріп, болашақ жеңістерге жол ашқан маңызды қадам болды.
