Республика күні қарсаңында Алматы облысының Райымбек ауданында тұрғындар үшін маңызды екі нысан іске қосылды. Нарынқол ауылында заманауи емхана мен ветеринариялық зертхананың ашылуы халыққа медициналық қызмет көрсету сапасын арттырып, өңірдегі мал саулығын бақылау мүмкіндіктерін кеңейтпек. Жобалар шалғай ауданда әлеуметтік қызметтердің қолжетімділігін жақсартуға бағытталған.
Жалпы аумағы 6 650 шаршы метр болатын жаңа емхананың құрылысына 4,1 млрд теңге жұмсалған. Медициналық мекеме бір ауысымда 250 адамды қабылдай алады. Мұнда заманауи диагностикалық жабдықтар орнатылып, тұрғындардың денсаулығын тексеру мен емдеу үшін қажетті жағдай жасалған. Күндізгі стационарда тәулігіне 20 пациент ем қабылдай алады.
Емханада компьютерлік томография, рентген, маммография, флюорография, ультрадыбыстық зерттеу және электрокардиография секілді қызметтер көрсетіледі. Сонымен қатар жалпы практика дәрігерлері мен түрлі бағыттағы бейінді мамандар тұрғындарға медициналық көмек ұсынады. Созылмалы ауруларды бақылау, балалар мен жүкті әйелдердің денсаулығын қадағалау, вакцинация және профилактикалық тексерулер де қарастырылған. Бұл аудан тұрғындарына күрделі тексерулерден өту үшін басқа қалаларға жиі қатынау қажеттілігін азайтуға мүмкіндік береді.
Нысанның ашылу рәсіміне облыс және аудан басшылығы, медицина қызметкерлері, ардагерлер мен жергілікті тұрғындар қатысты. Алматы облысының әкімі Шыңғыс Сайранұлы медициналық көмектің қолжетімділігі мен сапасын арттыру, әсіресе шалғай елді мекендерді заманауи денсаулық сақтау инфрақұрылымымен қамтамасыз ету маңызды екенін атап өтті. Ауыл тұрғындары да жаңа емхананың ашылуын көптен күткенін жеткізді. Аудан ақсақалы Бекболат Бірбаевтың айтуынша, бұрын кейбір медициналық қызметтерді алу үшін қалаға баруға тура келсе, енді қажетті тексерулерді туған ауылында өткізуге мүмкіндік туды.
Нарынқолда ашылған екінші нысан – жылына 680 мыңға дейін зерттеу жүргізуге қауқарлы ветеринариялық зертхана. Мұнда жануарлардың жұқпалы әрі аса қауіпті ауруларын анықтап, мал өнімдерінің қауіпсіздігін тексеруге жағдай жасалған. Зертхананың жұмысы ауыл шаруашылығы үшін маңызды, өйткені малдың саулығы өнім сапасына, шаруашылықтардың тұрақтылығына және халықтың денсаулығына тікелей байланысты.
Өңір басшысы ветеринариялық қауіпсіздікті нығайту мен азық-түлік сапасын бақылаудың маңызын атап өтіп, жаңа мекеменің қажетті жабдықтармен қамтылғанын айтты. Зерттеу нәтижелері мамандарға аурулардың алдын алу шараларын уақытында ұйымдастыруға және ветеринариялық тәуекелдерді бағалауға көмектеседі.
Екі нысанның қатар іске қосылуы Райымбек ауданының әлеуметтік және ауыл шаруашылығы инфрақұрылымын дамытудағы маңызды қадам болды. Жаңа емхана тұрғындарға медициналық қызметті жақындатса, ветеринариялық зертхана мал шаруашылығының қауіпсіздігі мен тұрақтылығын қамтамасыз етуге үлес қоспақ. Ендігі міндет – осы мүмкіндіктерді тиімді пайдаланып, халыққа сапалы қызмет көрсетуді жолға қою.
