Алматы облысында «Таза Қазақстан» экологиялық акциясы қарқынды жүріп жатыр.
Алматы облысында биылғы экологиялық бастамалар үлкен қолдауға ие болды. 2025 жылдың басынан бері өңір тұрғындары табиғатты қорғауға белсене атсалысып, сенбіліктерге жаппай қатысуда. Нәтижесінде жүздеген саябақ, аулалар мен су айдындары тазартылып, мыңдаған ағаш отырғызылды.
Жалпы, өңірде 1952 көпқабатты тұрғын үй ауласы, 55 саябақ пен сквер, 254 тарихи-мәдени ескерткіш пен 462 әлеуметтік нысан тазартылды. Сонымен қатар 241 өзен-көл мен су қоймасының жағалауы ретке келтіріліп, 956 арнайы техника жұмылдырылды. Экологиялық науқан барысында 1,9 мың тонна қоқыс жиналып, 29,6 мың ағаш отырғызылды. Бұған қоса, 13 келі ағаш тұқымы себілді.
Табиғатты аялауға тек тұрғындар ғана емес, аймақтағы кәсіпорындар да өз үлестерін қосуда. Мыңдаған ұйым қызметкерлері мен еріктілер сенбілік жұмыстарына қатысып, қоршаған ортаны таза ұстауға өз еңбектерін сіңірді.
Экологиялық мәдениетті қалыптастыру мақсатында өңірде арнайы медиа-жоспар бекітілген. Соның аясында жыл басынан бері бұқаралық ақпарат құралдары мен әлеуметтік желілерде 7998-ден астам материал жарияланды. Бұл халықтың экологиялық санасын арттырып, қоғамның табиғатқа деген көзқарасын жақсартуға бағытталған.
«Алматы облысы – Қазақстанның ең көркем өңірлерінің бірі. Оның тазалығы мен сұлулығын сақтау – әрқайсымыздың ортақ міндетіміз. Қаншама адамның бұл іске бей-жай қарамай, өз үлесін қосқаны қуантады», – дейді сенбілікке қатысушылардың бірі.
«Таза Қазақстан» акциясы өңірде әлі де жалғасады. Ұйымдастырушылар тұрғындарды сенбіліктермен шектелмей, күнделікті өмірде де қоршаған ортаны қорғауға шақырады. Табиғатты аялау – тек белгілі бір науқанның емес, әр адамның күнделікті өмірінің бір бөлшегі болуы тиіс.
