Ақмола облысының әкімі Марат Ахметжановтың төрағалығымен өткен облыстық әкімдік отырысында алдағы жылу беру маусымына дайындық мәселесі қаралды.
– Ағымдағы жылы жылу беру маусымына дайындалуға барлық қаржыландыру көздерінен шамамен 32 миллиард теңге бөлінді. Көкшетау және Степногорск қалаларында жылумен жабдықтау көздері және желілерінің тозуы жоғары. Сондай-ақ Бурабай, Шортанды, Ақкөл, Атбасар аудандарында жөндеу жұмыстары ерекше назар аударуды талап етеді. Ондағы желілердің тозуы 56 пайыздан 81 пайызға дейін. Алдағы күзгі-қысқы кезеңге дайындық бойынша жөндеу науқаны бекітілген кестеге сәйкес жүзеге асырылады, – деп хабарлады энергетика және тұрғын үй коммуналдық шаруашылығы басқармасы басшысының міндетін атқарушы Ақжол Қылышбаев.
Жылыту маусымының сәтті өтуі және пәтерлерде температуралық режимді сақтау үшін маңызды фактор басқару органдарының көп пәтерлі тұрғын үйлерді қыста дайындауы болып табылады. Жоспарға сәйкес, облыста 2630 көп пәтерлі тұрғын үйдің дайындығын қамтамасыз ету қажет. Бұл тұрғыда Бурабай ауданында дайындығы кемшін түсіп отыр. Су тасқыны кезінде электр желілерінің 286 тірегі зақымдалды, бүгінгі таңда 196-сы қалпына келтіріліп, бұл жұмыстар жалғасуда.
Сонымен қатар жиын барысында жаңа абоненттерді жылу желілеріне қосу тәртібі, халықты көмірмен және мазутпен қамтамасыз ету мәселелері де талқыланды.
Өңір басшысы аудандар мен қалалардың әкімдіктеріне бейінді басқармалармен бірлесіп, жөндеу жұмыстарының барысына мониторинг жүргізуді және алдағы жылу беру маусымының үздіксіз өтуі үшін толық дайындықты қамтамасыз етуді тапсырды.
– Біз штаттан тыс жағдайлар орын алған кезде салдарының тәуекелдерін бағалау және зақымдануды азайту үшін тез әрекет етуге дайын болуымыз, жылумен жабдықтаудың бұзылуына жол бермеуіміз керек. Сондай-ақ апатты жағдайда отын мен материалдардың, жабдықтар мен техниканың нормативтік қорын қамтамасыз ету қажет, – деп түйіндеді облыс әкімі.
