Мойынқұм ауданының орталығындағы Амангелді және Д.Үдербаев көшелерінің қиылысында заманауи безендірілген, заман талабына сай жабдықталған, ұлттық нақыштағы және сәнді үлгідегі ерлер мен әйелдер киімдерін сататын дүкен ашылды.
Дүкенді ауданымыздың белгілі кәсіпкері, жүрегі жұмсақ, қолы ашық, әрдайым аудан көлемінде жасалып жатқан қайырымдылық шараларының демеушісі Лаура Серікбаева ашты. Жаңа нысанның ашылуы кәсіпкердің ізденімпаздығы мен жаңашылдыққа құмарлығының дәлелі десек те болады. Олай дейтінім, Лаура Шынболатқызы ашылу салтанатын өткізу үшін жан-жақты, әрі тыңғылықты дайындалған. Салтанатты іс-шараға аудан әкімінің орынбасары Сәбит Төлегенов, аудан әкімдігі кәсіпкерлік және өнеркәсіп бөлімінің басшысы Әбдіғали Әбдіразақов, «Атамекен» кәсіпкерлік палатасы аудандық филиалынының директоры Нәділ Үсібжанов, ауданның бас имамы Рысбай Еспенбетов және аудан көлемінде рәсімге жиналған кәсіпкерлер, ауыл тұрғындары мен қонақтары қатысты.
Ашылу рәсімінде алғашқы құттықтау сөзін аудан әкімінің орынбасары Сәбит Төлегенов алып, ақжарма тілегін білдірді. Ол Лаура Шынболатқызына аудан әкімінің Алғысхатын табыстады. Аудандық орталық мешіттің бас имамы Рысбай Еспенбетов бата бергеннен кейін ауыл жастары сатылымдағы киім үлгілерін киіп, сән көрсетті. Өнерпаздар ән айтып, мың бұралған бишілер тобы әсем биімен жиналғандардың көзайымы болды.
Лента қию салтанаты Лаура Шынболатқызының ағасы Тасболат Шынболатұлына тапсырылды. Ол да Лаура ханымның отбасылық дәстүрді, жылдар бойы жиналған, халықтың жазылмаған заңдылықтарын қатаң сақтайтынын, үлкендерді сыйлауда үлгі боларлық іс көрсететінін жеткізді.
Лента қиылып, жиналғандар ішке кіріп, сатылымдағы киімдермен танысып шықты. Содан соң «Бақ сарайы» мейрамханасында жайылған дастарқан басына жайғасты. Онда да қазақы салт-дәстүр бойынша бата беріліп, құран бағышталды. Қонақтар қатарында болған аудандық аналар кеңесінің төрағасы Ғалия Шубаева, қауымдастық мүшелері Айнаш Боташева, Шахаркүл Оспановалар аудандағы белсенді кәсіпкерлерді марапаттады.
Айта кету керек, жаңадан ашылған «LAU BREND» дүкеніннен бастапқы үш күнде алғашқы сауда жасаған 10 адамға дейін бағалы сыйлықтарға ие болады. Сонымен қатар әрбір 10 мың теңгелік чекке бір лоторея билеті беріледі.
Елдос ЕРҒАБЫЛҰЛЫ
