Республика күні қарсаңында Ақмола облысында тұрғындардың тынығуына арналған жаңа қоғамдық орын – «Бірлік» саябағы ашылды. Салтанатты іс-шараға облыс әкімі Марат Ахметжанов қатысып, өңірдің көркеюі мен экологиялық мәдениетті қалыптастырудың маңызын атап өтті.
Ашылу рәсімінде сөз сөйлеген Марат Ахметжанов қоршаған ортаны қорғау мен табиғи байлықтарды сақтау әр азаматтың күнделікті өміріндегі маңызды міндет болуы керектігін айтты. Өңір басшысының пікірінше, экологиялық жауапкершілік қарапайым әрекеттерден басталады. Айналаны таза ұстау, ағаш отырғызу, қоғамдық орындарға ұқыпты қарау және туған жердің табиғатын сақтау – ортақ іске қосылған нақты үлес. Бұл бағытта «Таза Қазақстан» жалпыұлттық бастамасының маңызы зор. Мемлекет басшысы Қасым-Жомарт Тоқаевтың бастамасымен жүзеге асырылып жатқан акция азаматтарды қоршаған ортаға жанашырлықпен қарауға шақырып, тазалық пен тәртіпті қоғамдық құндылық ретінде орнықтыруды көздейді.
Ақмола облысында аталған бастама аясында экологиялық іс-шаралар тұрақты ұйымдастырылып келеді. Қалалар мен ауылдарда сенбіліктер өткізіліп, көшелер мен қоғамдық аумақтар тазартылып, ағаш отырғызу жұмыстары жүргізілуде. Бұған қоса, тұрғындардың экологиялық сауаттылығын арттыруға арналған түсіндіру шаралары да қолға алынған. 2026 жылдың басынан бері өңірде 1 000-нан астам экологиялық іс-шара өткізілген. Оларға 17 мыңнан астам адам қатысып, елді мекендерді абаттандыруға және табиғи ортаны сақтауға атсалысты. Бұл жұмыстардың ауқымы экологиялық мәселелерді шешуде тұрғындардың белсенді қатысуы маңызды екенін көрсетеді.
Облыста қоршаған ортаны жақсартудың тағы бір басым бағыты – орман қорын молайту мен көгалдандыру. Биыл өңірде 2,8 мың гектар аумаққа шамамен 16 миллион көшет отырғызылды. Ал 2021–2025 жылдары 11 мың гектар жерге орман екпелері егілді. Осы кезеңде отырғызылған ағаштардың жалпы саны 74 миллионға жетті.
Өңірде тұрғындарға қолайлы орта қалыптастыру мақсатында саябақтар мен демалыс аймақтарын дамытуға да көңіл бөлінуде. Көкшетаудағы «Көк шалғын» және «Жаңа жағалау» саябақтары, Щучье қаласындағы «Ұмай ана» саябағы – осы бағыттағы жобалардың қатарында. Мұндай орындар тұрғындардың табиғат аясында демалуына, отбасымен уақыт өткізуіне және қоғамдық өмірге белсенді араласуына жағдай жасайды.
Жаңадан ашылған «Бірлік» саябағы да осы бастамалардың жалғасы ретінде тұрғындардың игілігіне қызмет етпек. Оның атауы да қоғамдағы татулық пен ынтымақтың мәнін айшықтайды. Республика күні қарсаңында ашылған нысан елді мекендерді көркейту ісімен қатар, ортақ құндылықтарды дәріптеуге бағытталған маңызды қадам ретінде бағаланады.
