Алматыда «UK Future Spaces» халықаралық форумы өтті. Форумға қазақстандық бизнес өкілдері мен инвесторлар қатысты. Іс-шарада облыс әкімі Марат Сұлтанғазиев сөз сөйледі.
– Алматы облысы бай мәдени мұрасымен және бірегей табиғи ресурстарымен танымал. Ежелгі Жібек жолының бойында орналасқан аймақ – инвестициялық жағынан тартымды және туристік тұрғыда танымал. Облыс аумағында британдық және бірлескен капиталдың қатысуымен 12 кәсіпорын жұмыс істейді. Өңірдің сыртқы сауда айналымы 3,6 миллиард АҚШ долларына жетті, бұл ретте экспорт 12,1 пайызға ұлғайып, 819,4 миллион долларды құрады.
Облыста дамыту жобаларын, көлік инфрақұрылымын және тұрақты құрылысты қоса алғанда, 2,5 триллион теңгеге 114-тен астам инвестициялық жоба іске асырылуда. Өңірде бір арнайы экономикалық аймақ және сегіз индустриялық аймақ жұмыс істейді. Инвесторлар үшін арнайы экономикалық аймақтар мен салықтық жеңілдіктер, мемлекеттік-жекешелік әріптестік тетіктері, жобаларды қолдау және қаржыландыру бағдарламалары ұсынылады.
Жаһандық талаптар құрылысқа жаңаша көзқараспен қарауды қажет етеді. 2050 жылға қарай әлем халқының 70 пайыздан астамы қалаларда тұрады, бұл сәулетшілер мен жоба жасаушыларға үлкен жауапкершілік жүктейді. «Ақылды» қалаларды құру, инфрақұрылымды басқаруды цифрландыру, процестерді автоматтандыру, жасыл архитектураны дамыту, көміртегі ізін азайту және жаңартылатын энергия көздерін енгізу маңызды, оны жаңа Алатау қаласында іске асыру жоспарлануда, – деген облыс әкімі бұл форумның жаңа идеялар, табысты жобалар мен ұзақ мерзімді әріптестік алаңына айналатынына сенім білдірді.
Форум барысында облыс әкімі Ұлыбританияның Қазақстандағы Елшісі Кэти Лич бастаған британдық делегациямен жүздесті. Сондай-ақ бизнес өкілдерімен жеке кездесулер өткізді. Бұл қатарда «Infrastructure Exports: UK» тең төрағасы Стюарт Синиор, «Zaha Hadid Architects» компаниясының басшысы Патрик Шумахер және «Gillespies» компаниясының негізін қалаушы Джим Диггл болды.
Ұлыбританияның Қазақстандағы Елшісі Кэти Лич форумға құрылыс және сәулет саласында өршіл идеяларды ұсынатын Ұлыбританияның 25-ке жуық танымал сәулетшісі қатысып отырғанын атап өтті. Олардың кейбірі Қазақстанда жұмыс істейді. Британдық сәулетшілер елімізде, оның ішінде Алматы облысында өз жобаларын жүзеге асыруға қызығушылық танытуда.
Облыс әкімі форумның құрылыс және сәулет саласының мамандары үшін маңыздылығын атап өтті. Іс-шара барысында ұсынылған ақпарат отандық мамандардың ой-өрісін кеңейтуге, сондай-ақ шығармашылық идеялардың дамуына және іске асырылуына ықпал етпек. Әкім өз сөзінде қатысушы компаниялар жобаларды ғана емес, сонымен қатар нысандарды толық іске асыруға дейін материалдар мен компоненттерді жеткізуді ұсына алатынын алға тартты.
Кездесу барысында Алатау қаласында білім беру орталықтары мен ғылым қалашығын салу мәселесі, сондай-ақ туризмді дамыту жайы талқыланды.
Іс-шара аясында құрылыс және инфрақұрылым саласында 40 жылдан астам тәжірибесі бар британдық маман Стюарт Синиормен кездесу өтті. Ол – «Gleeds» компаниясының тәуелсіз директоры және оның стратегиялық дамуы мен инновациясында шешуші рөл атқарады. Келіссөз барысында жаңа жобалармен бірлесіп жұмыс істеу және шығармашылық идеяларды іске асыру үшін екі ел мамандарының қатысуымен ынтымақтастық және жобалық кеңсе құру мәселелері талқыланды.
Бұдан кейін облыс әкімі «Zaha Hadid Architect» директоры Патрик Шумахермен кездесті. 500-ден астам әлемге әйгілі сәулет және дизайн студиясы бар Патрик Шумахер – құрылыс саласында кеңінен танымал жан. Келіссөз барысында жеке капиталды тарта отырып, бастамашыл жобаларды іске асыру мүмкіндігі талқыланды, бұл бюджетке түсетін жүктемені азайтуға мүмкіндік береді.
Соңғы кездесу ландшафттық сәулет және бас жоспарлау бойынша жетекші халықаралық консалтингтік компания «Gillespies» компаниясының басқарушы серіктесі Джим Дигглмен өтті. Осы салада 30 жылдан астам тәжірибесі бар Джим Диггл Еуропа, Таяу Шығыс, Азия және Африкадағы ең ірі халықаралық жобаларды жүзеге асырған. Келіссөз аясында горизонтальды көгалдандыру бағытындағы ынтымақтастық мәселелері, сондай-ақ жобалау кезеңінде ғимараттарға қойылатын талаптар жайы талқыланды. Сондай-ақ форум барысында Алатау қаласының әкімі Әркен Өтенов «Arup» компаниясының инфрақұрылым жөніндегі жаһандық директоры Лорна Баллмен және «Arup Türkiye» көлік бизнесінің басшысы Эмра Шимшекпен келіссөздер жүргізді. Олардың Ұлыбритания, Дания, Испания, Литва, Грузия, Өзбекстан және Қазақстанда жобалармен жұмыс істеу тәжірибесі бар.
Әңгіме барысында өңірдегі инновациялық сәулет шешімдерін жүзеге асыру және одан әрі ынтымақтастық мәселелері талқыланды.
Форумы қалалардың тұрақты дамуына және Қазақстанға халықаралық инвестицияларды тартуға ықпал ететін маңызды алаңға айналды. Онда озық қала құрылысы және сәулеттік шешімдер жайы кеңінен талқыланды.
