Жамбыл облысының әкімі Ербол Қарашөкеев жұмыс сапарымен Жуалы ауданына барып, бірқатар нысанның жұмысымен танысты.
Облыс әкімі алдымен Қарасаз ауылына атбасын бұрып, «Ауыл – ел бесігі» жобасы аясында салынып жатқан спорт кешенінің құрылысын көрді. Мұнда жұмыстар жоспарға сәйкес жүруде. Келер жылы балалар игілігіне берілмек. Бүгінде Жуалы ауданында 160 спорт нысаны жұмыс істеп тұр. Халықтың спортпен шұғылдану үлесі 40,8 пайызды құрайды. Ербол Қарашөкеев болашақ чемпиондар ауылда қанаттанатынын негізге алып, мердігер компанияға жұмысты сапалы және уақытылы аяқтау керектігін ескертті.
Шыңбұлақ ауылында медициналық пункттің құрылысы жүруде. Өңір басшысы жұмыс қарқынын бағамдап, кеткен кемшіліктерді тез арада реттеуді міндеттеді.
Бұдан соң «Темірбеков» шаруа қожалығына барды. Ербол Қарашөкеев егіс алқаптарын әртараптандыру, жоғары сұранысқа сай өнімдерді өсіру – уақыт талабы екенін айта келе, қожалық иесіне тауарлы сүт фермасын салуды ұсынды. Мемлекеттік қолдау шаралары көрсетілетінін жеткізді.
Қожалық алаңында аудан әкімінің орынбасары Рақымғазы Құниязов ауылшаруашылығы саласында атқарылған жұмыстардың есебін баяндады. Аймақта егін науқаны аяқталуға таяу, биыл жылдағыға қарағанда өнімділік жоғары. 85 438,1 гектар жерге дақылдар егіліп, жалпы түсімі 403 4188 тоннаны құрады. 2 002 гектарға су үнемдеу технологиялары енгізілді. 130-дан аса техника сатып алынып (жоспар – 171), аграршыларға 10 мың тоннадан аса минералды тыңайтқыш берілді.
Жұмыс сапары барысында Ербол Қарашөкеев Кәріқорған ауылына да табан тіреп, қайта жаңғыртудан өткен спорт мектебін аралап көрді. Аталған ауылдағы Т.Әкімов атындағы №7 мектептің жай-күйімен танысты. Білім ошағының жылу жүйесі көмірден газға көшкен, яғни өткен жылы модульді қазандық орнатылған. Ербол Қарашөкеев бұл жобаның ұтымдылығын кеңінен зерделеп, басқа да білім ошақтарына тәжірибені енгізу мүмкіндіктерін қарастыруды тапсырды. Модульді қазандық орнату – шығын көлемін үнемдеу бойынша тиімділігін көрсетіп отыр.
Облыс әкімі мал және егін шаруашылығымен айналысатын «Б.Сейдалиев» шаруа қожалығына, сүт өнімдерін өндіретін «Аqmol 2025» ЖШС-іне, минералды су өндірісін жолға қоюды жоспарлап отырған «Ақсай Жуалы» ЖШС-іне барып, жұмыс қарқынын көрді. Қожалық жем-шөп алқабын кеңейту мәселесін шешуді жоспарлап отыр. Облыс әкімі «Аqmol 2025» ЖШС-іне қуаттылықты арттыру қажеттігін жеткізді.
Сапар гемодиализ орталығында қорытындыланды. Медициналық мекеме бір мезетте 30 адамға қызмет көрсете алады. Бүгінде 13 науқас ем қабылдап жатыр.
