Алматы облысында табиғи ресурстарды қорғау және су айдындарының биологиялық әлеуетін арттыруға бағытталған жұмыстар жалғасуда. «Таза Қазақстан» жалпыұлттық бағдарламасы аясында Іле өзеніне 150 мыңнан астам балық шабағы жіберіліп, өзен жағалауында экологиялық сенбілік ұйымдастырылды. Бұл бастама су экожүйесін сақтауға, балық қорын толықтыруға және қоршаған ортаның тазалығын қамтамасыз етуге бағытталған.
Бүгінде өңірдегі табиғатты қорғау шаралары кешенді түрде жүзеге асырылып келеді. Жыл басынан бері Іле өзені, Балқаш көлі және Қапшағай су қоймасына жіберілген шабақтардың жалпы саны 600 мыңнан асты. Ал қазан айының соңына дейін бұл көрсеткішті 4 миллионға жеткізу көзделген. Мамандардың пікірінше, мұндай жұмыстар су айдындарындағы тіршілік тепе-теңдігін сақтап, балық популяциясын қалпына келтіруге мүмкіндік береді.
Экологиялық акцияға сала мамандары, мемлекеттік органдардың өкілдері, жастар және еріктілер қатысты. Алматы облысы әкімінің орынбасары Бақытнұр Бақытұлы да шараға қатысып, табиғи байлықты қорғау – ортақ жауапкершілік екенін атап өтті. Оның айтуынша, облыс әкімі Шыңғыс Сайранұлының тапсырмасына сәйкес өңірдің су айдындарына балық жіберу жұмыстары жүйелі түрде жүргізілуде. Бұл бастамалар «Таза Қазақстан» бағдарламасының негізгі міндеттерімен сабақтасып, қоршаған ортаға ұқыпты қарау мәдениетін қалыптастыруға ықпал етеді.
Іс-шара барысында экологиялық жауапкершілікті насихаттауға жастар да белсенді үлес қосты. «Жасыл ел» еңбек жасағының өкілдері балық шабақтарын суға жіберуге қатысып қана қоймай, Іле өзенінің жағалауын қоқыстан тазартуға атсалысты. Акцияға қатысқан Диляра Қабдолинаның сөзінше, қыркүйек-қазан айларында өңірдегі осындай бастамаларға мыңға жуық жас жұмылдырылған. Олар тарихи ескерткіштерді абаттандыруға, өзен-көл жағалауларын тазартуға және қоғамдық маңызы бар экологиялық жобаларды жүзеге асыруға көмектесіп келеді.
Мамандардың мәліметінше, суға жіберілген балық шабақтарының шамамен 80 пайызы өсіп-жетіледі. Жыл сайын жүргізілетін осындай шаралар балық қорын молайтуға ықпал етіп, су ресурстарын тиімді пайдаланудың маңызын арттырады. Бұл бағыттағы жұмыстар ғылыми зерттеулермен де ұштасып, табиғи байлықты келер ұрпаққа сақтап жеткізуге негіз болады.
Іле өзенінде өткен акцияның ерекшелігі – табиғатты қалпына келтіру мен қоршаған ортаны тазарту жұмыстарының қатар жүргізілуінде. Мұндай бастамалар тұрғындарды ортақ іске жұмылдырып, экологиялық мәдениетті нығайтуға жол ашады. «Таза Қазақстан» бағдарламасы аясындағы жұмыстар алдағы уақытта да жалғасып, өңірдің табиғи ортасын қорғауға бағытталған жаңа шаралар жүзеге асырылмақ.
