XXXIII жазғы Олимпиада ойындарының чемпионы, ҚР еңбек сіңірген спорт шебері Елдос Сметовті Жамбыл жұртшылығы Тараз қаласының шығыс қақпасынан сән-салтанатпен қарсы алды.
Салтанатты іс-шараға Жамбыл облысының әкімі Ербол Қарашөкеев, өңір тұрғындары мен зиялы қауым өкілдері, спорт жанкүйерлері, белсенді жастар қатысты.
Елдос Сметов көліктен түскен бойда өнерпаздар әндерін әуелетіп, ақ жаулықты әжелер шашуын шашып, ұлттық дәм ұсынды. Жамбыл облысы спорт ардагерлері кеңесінің төрағасы Тәуірбек Қарауылтегі Олимпиада чемпионына ақ батасын берді.
Облыс әкімі Елдос Сметовке барша жамбылдықтардың атынан алғыс білдірді.
– Елімізге, туып-өскен жерің – Жамбыл төріне Олимпиада чемпионы болып оралуыңмен құттықтаймын! Бұл жеңіс – жалпы қазақстандықтардың, жамбылдықтардың ортақ қуанышы! Сен нағыз батырсың! Өзіңе сенім артқан Мемлекет басшысының, барша жанкүйерлердің, жамбылдықтардың үмітін ақтадың! Сенің бұл жеңісің Жамбыл облысының 85 жылдығына тамаша тарту болды деп білемін!
Өзің бала кезден күнделікке жазып, Олимп шыңын бағындыруды армандадың! Сол арманыңа маңдай теріңмен жете білген нағыз ер азаматсың!
Кезінде Қажымұқан атамыз атой салған Париж төрінде жеңіске жетіп, данқты спортшы Жақсылық ағамыздың арманын 44 жылдан кейін орындай білдің!
Сенің есімің Олимпиаданың 3 дүркін жүлдегері ретінде ел тарихында қалатыны сөзсіз!
Қасиетті Әулиеата топырағынан дарыған тектілік, күш-жігерің сені осындай жетістікке жетеледі деп ойлаймын! Әр белдескеніңде барша жанкүйерлерің, әсіресе, жерлестерің – жамбылдықтар барынша тақым қысып, тілеуіңді тілеп отырды.
Бұл жеңісіңде – ата-анаңның, отбасыңның тәлім-тәрбиесі мен қолдауы, жаттықтырушыларыңның да зор еңбегі жатыр. Біз сені мақтан тұтамыз, — деді Ербол Қарашөкеев.
Елдос Сметовті қарсы алу рәсімі Ж.Жабаев даңғылы мен Ы.Сүлейменов көшесі бойынша көліктердің салтанатты шеруімен жалғасты. Жол бойындағы жамбылдықтар чемпионға зор құрмет, ыстық ықыластарын білдірді.
Жамбыл облысы әкімдігінің қолдауымен «Тараз» орталық стадионында ХХХlll жазғы Олимпиада ойындарының чемпионы Елдос Сметовтің құрметіне гала-концерт ұйымдастырылды. Спорт шеберіне құрмет көрсетуге 15 мыңға жуық жамбылдық жиналды.
Алдымен Елдос Сметовтің спорттағы жолы туралы бейнеролик көпшілік назарына ұсынылды.
Салтанатты іс-шарада Жамбыл облысының әкімі Ербол Қарашөкеев құттықтау сөз сөйлеп, Франция төрінде Олимп шыңын бағындырған Елдос Сметов пен оның жеке жаттықтырушысына құрмет көрсетті.
– Ел баласы Елдос Сметов Тәуелсіз Қазақстанның тарихында дзюдодан тұңғыш Олимпиада чемпионы атанып отыр. Данқты спортшы Жақсылық Үшкемпіров ағамыздан кейін бірде-бір қазақ баласы бұл биікті бағындырған емес. Араға 44 жыл салып Елдос Сметов қазақтың көптен күткен арман-мақсатына қол жеткізді.
Қазақ елін әлем алдында паш еткен небір сайыпқырандар, саңлақ спортшылардың дені – Әулиеата топырағынан түлеп ұшқан. Олимпиада чемпиондары – Жақсылық Үшкемпіров, Ермахан Ибраимов, Бахтияр Артаев, Олимпиада ойындарының жүлдегерлері Серік Қонақбаев, Ислам Байрамуков, Болат Жұмәділов, Болат Ниязымбетов, Ақжүрек Таңатаровтар алты алаштың абыройын аспандатқан ел мақтаныштары!
Әулиеата өңірі – чемпиондар өлкесі, мықтыбапкерлер ордасы. Қасиетті Жамбыл жері ер Елдостың жеңісінен кейін жауырыны жер иіскемеген палуандардың басты ордасы десек қателеспейміз. Елдостың ерлігі мен жеңісі барша қазақстандыққа ортақ қуаныш. Қазақспортының даңқы арта берсін! – деді облыс әкімі.
Ербол Қарашөкеев төрткүл дүние көз тіккен төртжылдықтың басты додасында топ жарған Елдос Сметовке облыс әкімдігінің ұйымдастыруымен демеушілердің тарапынан Тараз қаласынан 5 бөлмелі пәтер (пентхаус) және соңғы үлгідегі Lexus 600 автокөлігінің кілтін табыстады. Спорт саңлағының жеке бапкері Ғалымжан Жылгелдиевке 2 бөлмелі пәтер мен Hyundai Santa Fe автокөлігінің кілті берілді.
– Олимпиада ойындарында елімнің көк байрағын көкке көтеріп, әнұранымызды шырқату менің бала кезден бергі арманым болатын. Сол мақсатқа жету жолында аянбай тер төктім. Жақсылық Үшкемпіров атамыздың тілегін орындағаныма өте қуаныштымын. Барша жанкүйерлеріме ерекше алғыс айтқым келеді. Қолдауларыңызды сезіндім. Жерлестеріме көп рақмет! – деді ҚР еңбек сіңірген спорт шебері Елдос Сметов.
Салтанатты іс-шарада Олимпиада чемпионының жеке жаттықтырушысы Ғалымжан Жылгелдиев те сөз алып, ортақ мақсат пен төккен тердің ақталғанын атап өтті.
Гала-концерт соңы елімізге танымал эстрада жұлдыздарының концерттік бағдарламасы мен отшашуға ұласты.
Еске сала кетейік, Елдос Сметов 2016 жылы Рио Олимпиадасында күміс, 2020 жылы Токиода өткен төртжылдықтың басты додасында қола медальді еншілеген болатын. Татами шебері Парижде өткен ХХХІІІ жазғы Олимпиада ойындарында жеңіс тұғырынан көрініп, ел қоржынына алғашқы алтынды салды.
