Газетіміздің өткен 4 наурыздағы нөмірінде Үкімет басшысы Олжас Бектеновтің Қытайдың жетекші металлургия компанияларының бірі «Fujian Hengwang Investment Co.,Ltd» компаниясының басқарма төрағасы Цзэн Чжаоцянмен кездескенін жазған едік. Онда Жамбыл облысындағы «Jibek Joly» арнайы экономикалық аймағы аумағында қуаты 3 миллион тонна болат өндіретін металлургия комбинатын салу жобасына баса назар аударылғанын сөз еттік. Қытайлық инвестордың жалпы инвестиция сомасы 1,2 миллиард долларға бағаланғанын, жоба шеңберінде 2,5 мың жұмыс орны ашылатыны жоспарланған. Құрылыс жұмыстары көп күттірмей, алдағы сәуір айында басталатын көрінеді.
Өңірден осындай ауқымды жоба жүзеге сәтімен асатын болса, жұмысқа бірінші жергілікті тұрғындар тартылса дейміз. Облыс аумағының жерін беріп, Қазақстанның өндірісті өңірлері Қарағанды, Қостанай және Ұлытау облыстарында өндірірелетін табиғи газ, темір рудалары және әктас пайдалынатын болған соң, қазақстандықтарды, оның ішінде жамбылдықтар жұмысқа тартылуы тиіс.
Кездесуде Үкімет басшысының «Жобаның біз үшін маңызы зор. Бұл – еліміздің экспорттық мүмкіндіктерін кеңейтуге жол ашатын маңызды бағыт. Инвестициялық жобаларды жедел іске асыру үшін Қазақстан Үкіметі жанынан Инвестициялық штаб жұмыс істейді. Үкімет сіздің жоспарларыңызды толығымен қолдайды және оларды жүзеге асыру үшін тиісті қолдау көрсетеді», дегенін еске алсақ, қытайлық инвестор жергілікті тұрғындарды жұмыспен қамтуға қарсы бола қоймас. Жоба аясында 2500 жұмыс орны ашылатынын ескерсек, бұл дегеніңіз үлкен жұмыс күші. Үкімет жанынан жұмыс істейтін Инвестициялық штаб пен облыстық әкімдіктің назарында болатын бірінші мәселе – осы.
Оған облыста білікті мамандар жеткілікті. Мәселен, өңірдегі тіпті, Қазақстандағы іргелі кәсіпорындардың бірі «Казфосфат» жауапкершілігі шектеулі серіктестігінің зауыттарында, кен орындарында, басқа да құрылымдарында мыңдаған жергілікті тұрғындар еңбек етуде. Тау қопарып, тас жарған жамбылдықтар қандай жұмысты болмасын игеріп алып кетеді. Тараз қаласындағы техникалық жоғары және арнаулы оқу орындарының түлектері ішінен қытайлық жобаны жүзеге асыруға мамандандырылған түлектер де шығады.
Үкіметтің қолдау, көмегімен облыста ауқымды жоба жүзеге аспақ екен, мұндай мүмкіндікті қалт жіберуге болмайды. Егерде жоба сәтімен жүзеге асып, іске қосылып жатса, онда жамбылдық жұмысшы-қызметкерлер еңбек етсе, биылғы «Жұмысшы мамандықтарының жылына» бұл үлкен тарту болмақ.
