Жамбыл облысында «TazaLike» экологиялық акциясы бастау алды. Іс-шараның мақсаты — қоршаған ортаны қорғау және экологиялық мәдениетті қалыптастыру.
«Болашақты бірге отырғызамыз» ұранымен Тараз қаласындағы «Бәйтерек» шағынауданында орналасқан №3 мектеп-лицейінен бастау алған акция барысында облыс әкімі Ербол Қарашөкеев оқушылармен бірге 150-ге жуық ағаш отырғызып, жасыл желектерді көбейтуге үлес қосты.
Акцияның екінші кезеңі «Ұлы дала» шағынауданында өтті. Бұл іс-шараға облыстық және қалалық ардагерлер кеңесінің мүшелері, мәслихат депутаттары, зиялы қауым, құқық қорғау органдарының қызметкерлері, спортшылар мен жастар қатысты. Олар 500 түп ағаш көшетін екті.
Акцияға Тараз, Жаңатас, Қаратау және Шу қалаларының тұрғындары да белсене атсалысты. Олар «Таза қала» іс-шарасы аясында күл-қоқыс шығарып, арықтар мен каналдарды тазалады.
«TazaLike» экологиялық акциясы 15 наурыздан 20 сәуірге дейін жалғасады. Оның аясында апта сайын аудандық деңгейде жаппай сенбіліктер ұйымдастырылады. 19, 20 және 27 наурыз күндері «Бүкілқазақстандық ағаш отырғызу», «Жасыл қала», «Қалаға арналған ағаш» атты іс-шаралар өткізіледі. Барлық іс-шараларға демеушілер тартылып, облыс орталығы мен аудандарда 7 мыңнан астам ағаш көшеті отырғызылады деп жоспарлануда.
