Облыс әкімі Нұралхан Көшеровтің төрағалығымен өткен аппараттың апталық мәжілісінде Ұлы Жеңістің 80 жылдығын атап өту бойынша іс-шара жоспары кеңінен талқыланып, атқарылатын жұмыстар пысықталды, – деп хабарлайды Түркістан облысы әкімінің баспасөз қызметі.
Облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева өз баяндамасында жоспардағы іс-шаралар мерекелік күндері ғана емес, жыл бойы жүзеге асырылатынын атап айтты. Оның айтуынша, бүгінгі таңда Түркістан облысында Ұлы Отан соғысына қатысушылар мен оларға теңестірілген 3305 адам тұрады. ҰОС қатысушыларға теңестірілгендер саны 227 болса, тыл еңбеккерлері – 3069 адам.
Ұлы Жеңістің 80 жылдығына орай 3305 адамға біржолғы ақшалай әлеуметтік көмек көрсету үшін аудан, қала бюджеттері есебінен 242 миллион теңге қаралып отыр екен. Оның ішінде екінші дүниежүзілік соғыстың көзі тірі тоғыз ардагерінің әрқайсысына әкімдік тарапынан 5 миллион теңге көлемінде біржолғы материалдық көмек берілмек. Ал, Ұлы Отан соғысы ардагерлеріне теңестірілген азаматтарға санаттары бойынша 50 мың теңгеден 120 мың теңгеге дейін біржолғы қаржылай көмек көрсету жоспарланып отыр. ҚР «Ардагерлер туралы» Заңына сәйкес, әлеуметтік қолдау шаралары да көрсетілмек.
– Одан бөлек, «Ұлы Отан соғысындағы Жеңіске 80 жыл» мерейтойлық медалімен
марапатталатын адамдардың тізімі жасалуда. Ұлы Отан соғысы ардагерлері мен оған теңестірілген азаматтардың әлеуметтік жағдайын анықтау мақсатында аудан, қала әкімдіктері арқылы әлеуметтік карта жасақталды. Ардагерлердің денсаулығы мен тұрмыстық жағдайы сараланды. Сауықтыру шараларын жүргізу мақсатында соғыс ардагерлеріне арналып жасақталған әлеуметтік картаға сәйкес жыл басынан 500-ге жуық ардагерге медициналық қызмет көрсетілді. Сонымен қатар, «Ардагерлер үйі» мен «Мейір» ардагерлер үйі» арқылы жылына егде жастағы 7800 адамға сауықтыру қызметтері көрсетілуде, – деді басқарма басшысы.
Жиында іс-шаралар жоспары туралы баяндаған облыстық қоғамдық даму басқармасының басшысы Ерлан Күзембаев Ұлы Жеңістің 80 жылдығы аясында облыста ауқымды іс-шаралар өткізу көзделіп отырғанын жеткізді. Атап айтқанда, батырлардың есімдерін насихаттау мақсатында түрлі конкурстар, экскурсиялар, ғылыми-практикалық конференциялар, «Жас Ұлан» әскери-спорттық ойындары, бұқаралық спорттық шаралар, Әскерлердің шеруі өткізіліп, мерекелік концерттер, тақырыптық кино кештері, архив құжаттары топтамасынан көрме, кездесулер ұйымдастыру жоспарлануда. «Саламатты Қазақстан» мамандандырылған пойызын іске қосу аясында ҰОС қатысушыларына, тыл еңбеккерлері мен шалғай стансалардың тұрғындарына білікті мамандар тарапынан тегін емдеу шаралары ұйымдастырылуда.
