Жамбыл облысында күзгі егін жинау науқаны қарқын алып, дала еңбеккерлері күн-түн демей тынымсыз жұмыс істеуде. Биыл аймақ бойынша ауылшаруашылығы дақылдары 640 мың гектар жерге егілді. Бұл өткен жылмен салыстырғанда 14 мың гектарға артық.
Атап айтқанда, 362 мың гектар алқапқа дәнді және дәнді-бұршақты дақылдар егілсе, майлы дақылдар 38 мың гектарды құрайды. Бұдан бөлек, 31,1 мың гектарға көкөніс, 12,7 мың гектарға бақша өнімдері, 8,2 мың гектарға картоп және 6,6 мың гектарға қант қызылшасы орналастырылды. Мал азығы үшін 181,3 мың гектар жер пайдаланылған.
Шілде айында басталған жиын-терін жұмыстары бүгінде бел ортасына келіп, маңызды нәтижелер беруде. Масақты дәнді дақылдардың 311,1 мың гектары жиналып, одан 462,1 мың тонна өнім алынды. Оның ішінде бидай – 201,5 мың тонна, арпа – 260,6 мың тоннаны құрап отыр.
Сонымен қатар, бүгінгі күнге дейін 58,2 мың тонна картоп, 334,4 мың тонна көкөніс, 336,1 мың тонна бақша өнімдері мен 3,2 мың тонна майлы дақыл жиналды. Бұл – еңбек адамдарының тынымсыз тері мен маңдайынан төгілген тердің жемісі.
Алдағы мал қыстату науқаны да назардан тыс қалмаған. Қазіргі таңда 1,7 миллион тонна пішен, 113,4 мың тонна пішендеме және 408,7 мың тонна сабан дайындалды. Бұл жұмыстардың барлығы мал шаруашылығын қыс мезгіліне толықтай қамтамасыз етуге бағытталған.
Жалпы, биыл Жамбыл облысында 3,8 миллион тонна ауылшаруашылығы өнімін жинау жоспарланып отыр. Диқандардың еңбегі мен табиғаттың қолайлы жағдайы бұл межені бағындыруға толық мүмкіндік береді.
Ауыл еңбеккерлерінің ерен еңбегі мен табандылығының арқасында Жамбыл даласы тағы бір берекелі күзді қарсы алуда.
