Ел Президенті Қасым-Жомарт Тоқаевтың Ұлттық құрылтайдың IV отырысында ұлттық киімге қатысты айтқан сөзі қоғамда зор қолдау тауып отыр. Шындығында, ұлттық киім – әрбір халықтың болмысын, тарихын, дүниетанымын бейнелейтін құндылық. Сондықтан оны тек мерекелік іс-шараларда ғана емес, күнделікті өмірде де кию – ұлттық сананың жаңғыруына жасалған нақты қадам.
Ұлттық киім – бұл халықтың өмір салтын, салт-дәстүрін, дүниетанымын айқын көрсететін мәдени құндылық. Қазақтың шапаны, сәукелесі, камзолы мен бешпенті – халқымыздың ғасырлар бойы қалыптасқан болмысын бейнелейді. Біле білсек, әрбір ою-өрнекте, түстердің үйлесімінде терең мағына жатыр.
Президентіміз Қасым-Жомарт Тоқаев өз сөзінде бет-жүзді толық тұмшалайтын қара киімдердің біздің ұлттық болмысымызға сай келмейтінін баса айтты. Расында да, қазақ әйелдері ертеден ашық жүзді, еңсесі тік, сәнді киінген. Сәукеле мен камзол, үкілі тақия мен қос етек көйлек – қазақ әйелінің сұлулығын одан әрі айшықтай түсетін киімдер. Сондықтан дәстүрлі киім үлгілерін қайта жаңғырту – мәдени мұрамызды дәріптеудің бір жолы.
Елімізде Наурыз мейрамы он күн бойы әртүрлі атаулы күндермен атап өтіліп келеді. Осы он күннің ішінде ерекше мәнге ие болғаны – «Ұлттық киім күні». Бұл күн халықтың зор қолдауына ие болып, ұлттық киімге деген сұранысты арттырды. Кейінгі жылдары қазақы ою-өрнекпен көмкерілген киімдер тек ұлттық мерекелерде ғана емес, күнделікті өмірде де киіле бастады. Бүгінде бұл үрдістен мектеп оқушылары да қалыс қалмауда. Мәселен, біздің мектепте әр жұма – ұлттық киім күні. Барлық ұстаз бен оқушы ұлттық нақышта киініп жүреді. Әр сыныптың таңдап алған өзіндік бірегей үлгісі бар. Сондай-ақ Наурызнаманың онкүндігі басталғалы бері мектептегі стиль ұлттық киімге ауысты.
Ұлттық киімді насихаттау – қазақтың мәдени мұрасын дәріптеумен қатар, отандық өндірісті дамытуға да ықпал етеді. Бүгінде тігін шеберханалары көбейіп, ұлттық нақыштағы брендтер де пайда бола бастады. Бұл – экономикамызға да оң әсерін тигізетін маңызды фактор. Егер ұлттық киімге деген қызығушылық арта берсе, болашақта қазақы киімдерді әлемдік нарыққа шығару мүмкіндігі де кеңейе түспек.
Президент айтқандай, ұлттық бірегейлікті нығайту – әрбір азаматтың міндеті. Бұл тек киімге қатысты емес, ұлттық дәстүрлерді сақтауға, мәдени мұраны жаңғыртуға да тікелей байланысты. Біздің мақсат – ұлттық киім киюді сәнге айналдыру ғана емес, оны мақтан тұту, ұрпақтан-ұрпаққа жеткізу. Өйткені, ұлттық киім – ұлттың жаны, ұлттың рухы.
