Астанада жас оқырмандарға арналған «Әлихан мен Әйкерімнің саяхаты» атты тарихи комикстің алғашқы шығарылымы таныстырылды. Бұл туынды қазақ тарихына деген қызығушылықты арттыруға және балалардың тарихи танымын кеңейтуге бағытталған.
Комикс «Бозоқ» мемлекеттік тарихи-мәдени музей-қорығының бастамасымен жарық көрді. Туындының таныстырылымына шығармашылық зиялы қауым өкілдері, ғалымдар және астаналық мектептердің ұстаздары қатысты.
Жоба Қазақстан Республикасының мәдени саясатының 2023-2029 жылдарға арналған тұжырымдамасы аясында жүзеге асырылды. Құжатта балалар мен жасөспірімдерді қазақ әдебиеті мен мәдениетіне баулу, сондай-ақ ұлттық мазмұндағы комикстер әзірлеу міндеті көзделген. Осы мақсатта «Бозоқ» музей-қорығы тарихи оқиғалар мен археологиялық зерттеулерге негізделген комикс жасап, оны үш тілде – қазақ, орыс және ағылшын тілдерінде ұсынды.
Комикстің иллюстрациясын музей-қорықтың дизайнері Бекен Байзақұлы әзірлеген. Ал, негізгі сюжеттік желі ортағасырлық Бозоқ қалашығында жүргізілген археологиялық қазба деректеріне сүйенеді.
Таныстырылым барысында қатысушылар өскелең ұрпақтың тарихи санасын қалыптастыруда балалар әдебиетінің рөлін, тарихи-мәдени мұраны дәріптеу маңыздылығын және осындай жобалардың білім беру жүйесіндегі ықпалын талқылады. Жаңа комикс – балалардың тарихты жеңіл әрі қызықты форматта меңгеруіне жасалған маңызды қадам.
