Жетісу облысының орталығы Талдықорған қаласында Наурыз мерекесін атап өту аясындағы «Шаңырақ күніне» орай әлеуметтік жағынан осал топтағы азаматтарға, асыраушысынан айырылған балаларға, көп балалы отбасыларға жаңа 60 пәтер берілді.
«Бірлік» шағынауданындағы жаңа қоныс иелерін қуаныштарымен облыс әкімі Бейбіт Исабаев құттықтап, пәтер кілтін тапсырды.
– «Самұрық Қазына» қоры Талдықорған қаласында, Панфилов және Кербұлақ аудандарында тұрғын үйлер салып береді. Бүгін сол үйлердің алғашқы легі өздеріңізге ұсынылып отыр. Өткен жылы Талдықорған қаласының өзінде 1283 отбасы баспаналы болса, биыл 1500-ге жуық отбасыға баспана кілті табысталатын болады, – деді облыс басшысы.
Мүгедек бала асырап отырған ана Гүләйім Абилхамиева – жаңа қонысқа ие болғандардың бірі.
– Үш балам бар. Кемтар баламенен он үш жыл үй кезегінде тұрдық. Бүгін қолымызға жаңа пәтердің кілті тиді. Бәрінен де баламның күтіміне жайлы болатынын ойлап, ерекше қуанып тұрмын, – дейді ол қуанышын жасырмай.
Жетісу облысы әкімінің баспасөз қызметінің хабарлауынша, «Шаңырақ күнінде» белгіленген іс-шаралар отбасы институтын нығайтуға, отбасы құндылықтарын насихаттауға бағытталуда. Осыған орай, облыстың аудан-қалаларында елу жыл отасқан отбасылармен кездесулер, үлгілі шаңырақ иелерімен сыр-сұқбаттар, жас отбасылар байқаулары, неке қию рәсімі, жаңа туған жас нәрестелер мен олардың аналарын құттықтау, т.б. іс-шаралар өткізілуде.
Түркістанда 2,5 тонна Наурыз көже дайындалады
Ұлыстың ұлы күні – Наурыз мерекесіне орай, 19 наурыз күні Түркістандағы «Керуен Сарай» кешенінде 2,5 тонна Наурыз көже дайындалды. Іс-шаранаң мақсаты – береке мен молшылықтың символы болған ұлттық тағамды дәріптеу, дейді ұйымдастырушылар.
Жұрт Наурыз көжені арнайы белгіленген орындарда 150 теңгеден сатып алды. Ал, жиналған барлық қаражат балалар үйіне қайырымдылық ретінде берілді.
Жігіттер жілікті қолмен сындырып жарысты
Наурыз мейрамына орай Петропавлдағы мектептердің бірінде жілік сындырудан алғаш рет ата-аналар мен оқушылар, ұстаздар арасында жарыс өтті. Жарысты Петропавл қаласының Назарбаев Зияткерлік мектебі ұйымдастырды. Оған 50 шақты адам қатысып, ептілік пен білектің күшін сынады.
Ұйымдастырушылардың айтуынша, жілік сындыру – қазақтың көне ойындарының бірі. Оның мәні – тойдан қалған жілік сүйегін қолмен жарып, сындыру. Бұл ойын күш, төзімділік және дұрыс техниканы қажет етеді. Ежелгі уақытта жілік сындыру тек ойын-сауық қана емес, сонымен қатар, бозбалалардың күші мен ептілігін көріп, ересек өмірге дайындығын тексеру тәсілі болған.
– Кішкентай кезімде әкемнің достары келіп, осылайша жілік сындырып ойнайтын. Мен де өз күшімді сынап көрмек болдым. Бұл ойында бірінші болып ұрғандарға қиын, ал менің жолым болды, соңына қарай ұрғандықтан тез сынды деп ойлаймын, – дейді мектеп оқушысы Алихан Гусейнов.
Мектеп ұжымы бұл іс-шараны дәстүрге айналдыруды жоспарлап отыр.
Гвардияшылар ұлттық киім киді
Ақтаудағы Ұлттық ұланның 6656 әскери бөлімі Наурыз мерекесін тойлау, әскери қызметшілер арасында ұлттық дәстүрді нығайтып, өзара татулық пен бірлікті ұлықтау мақсатында «Ұлттық киім күнін» атап өтті.
ҚР Ұлттық ұланы «Батыс» өңірлік қолбасшылығы баспасөз қызметінің хабарлауынша,бұл күні әскери қызметшілер әскери формаларын шешіп, ұлттық киім киген. Іс-шара барысында әскери бөлімдегі әйел қызметкерлер сарбаздарға бауырсақ, қымыз, түрлі тәттілер әзірлеп, ұсынды.
