Мемлекет басшысының экологияны қорғау және дамыту жөніндегі тапсырмасына сәйкес, Жамбыл облысында 2021-2027 жылдары 143 миллионнан астам ағаш отырғызу жоспарланған.
Бүгінде өңірдегі мемлекеттік орман қорының жалпы аумағы 4,4 миллион гектарды құрайды. Соңғы төрт жыл ішінде 49,9 мың гектар жерге 94,8 миллион дана көшет отырғызылып, белгіленген жоспар толығымен орындалды.
Биыл 8,9 мың гектар аумаққа 16,1 миллион түп ағаш егілмек. Бұл мақсатқа 181,6 миллион теңге қаржы бөлініп, қажетті көшет қоры толық дайындалды. Сонымен қатар, жыл сайын 240 гектар уақытша тұқымбақтарда жас көшеттер өсіріледі.
Өткен жылы мемлекеттік орман қоры аумағындағы 67 мың гектар жердің топырағы зерттеліп, оның 34,5 мың гектары орман дақылдарын отырғызуға жарамды деп танылды.
Орман шаруашылығы мекемелерінің материалдық-техникалық базасын нығайтуға соңғы төрт жылда 970 миллион теңге бөлінді. Бұл қаражатқа орманды молықтыру, қорғау және күтіп-баптау мақсатында арнайы техника мен қажетті құрал-жабдықтар сатып алынды. Қазіргі уақытта 1,8 миллиард теңгеге 60 өрт сөндіру техникасын алу жұмыстары жүргізілуде.
Бұдан бөлек, елді мекендерді көгалдандыру жұмыстары да қолға алынған. Орман шаруашылықтары осы мақсатта 763 мыңнан астам көшет өсіріп, жасыл аймақтарды кеңейтуге үлес қосуда.
Экологиялық тепе-теңдікті сақтау және орман алқаптарын ұлғайту бағытындағы жұмыстар алдағы уақытта да жүйелі түрде жалғасады.
