Сексеннің сеңгіріндегі қызылордалық Бектай Сүлейменов қария қарапайым бағбан. Бірақ, бұқаралық ақпарат құралдары ол туралы жарыса жазып жатыр. Оның жөні де бар. Бектай ақсақал өзінің 85 жылдық өмірінде 2 миллионнан астам ағаш отырғызып, баптап өсірген.
Бектай Сүлейменов есін білгелі бау-бақшамен айналысып келеді. Бұл ретте ақсақал, Мемлекет басшысы бастаған «Таза Қазақстан» акциясының белсенді қатысушысы.
Биыл Бектай Сүлейменовтің өзінің шаруа қожалығын құрғанына 34 жыл толады. Бұл шаруада оған ұлдарының бірі көмектескен.
Әр үйдің маңында түрлі жеміс ағаштары мен гүл қаулап өсіп тұратын Шымкент қаласы маңындағы Шардара ауданында 1940 жылы дүниеге келген, танымал бағбан әкесі жанынан қалдырмайтын, алғашқы жеміс ағашын үш жасында әкесімен бірге отырғызған оның мектепті тәмамдағаннан кейін әке жолын қуып бағбандық кәсіпті таңдағанына таңқалуға болмас.
«Әке көрген оқ жонар» демекші 1965 жылы Қазақ ауылшаруашылығы институтына түсіп, орман шаруашылығының маманы болып шығады. Облыстың үш ауданында орманшы қызметін атқарады.
Ақсақал 1991 жылы заман талабымен өзінің орман шаруашылығын ашып, терек, үйеңкі, қарағаштың көшеттерін өсіріп. сата бастапты. Бастапқыда 5 гектар аумақта басталған шаруа, 35 жылдың ішінде 25 гектарлық орманға айналған. Мұнда алма, алмұрт, шие, өрік, қара өрік, жидектер, жүзімнің әртүрлі сорттары, арша, терек, үйеңкі, қарағаш пен қарағай жайқалып өсіп тұр. Бүгінгі таңда ол отырғызған ағаштардың саны 2 миллионға жетіп жығылады екен.
– «Қызылорданың топырағы тұзды. Мұнда ағаш ексең, өліп қалады», дейді көбі. Ол жалқаудың сөзі. Бабын тапса, кез келген өсімдікті жерсіндіріп, жайқалтуға болады. Мәселен қылқан жапырақтыларды 11 жыл бұрын ектім. Қазір биіктігі 5 метрге дейін жетеді. Тіпті, тропикалық анар ағашынан жеміс алып отырмын. Тек тәсілін білу керек, ерінбеу керек, – дейді Бектай Сүлейменов.
Бір кереметі – бағбанның бағына ағын су келіп тұрған жоқ. Ол мұндағы жайқалып тұрған ағаштардың барлығын сорғы қондырғысымен-ақ суарып отыр. Қарт бағбан аумағы атшаптырым бақты өзі күтіп, баптайды. Көмекшісі – Құдай қосқан қосағы.
Ендігі арманы – туберкулез диспансерінің аумағында қылқан жапырақты ағаштар паркін құру. «Өйткені, олардың хош иісі өкпе аурулары бар науқастар үшін өте пайдалы», дейді ол.
