Тағдырдың қатал сынағын басынан өткергендердің бірі – қызылордалық Бауыржан Әбілов. Әдетте жас спортшылар үшін футбол – еркіндік пен қуаныштың көзі. Алайда, бұл ойын оның өмірін түбегейлі өзгертті. Футбол ойыны барысында оң көзіне доп тиіп, көзінің тор қабықшасы жарылып, жанары мүлдем көрмей қалды. Ота да сәтсіз аяқталды. Жиырма жасында зағип болған Бауыржанның жаңа өмірге қадам басуы қажет болды.
Осы оқиғадан кейін ол он жылға жуық үйінен шықпай, айналадағы адамдардан бөлек өмір сүрді. Достарының да тойларына қатыспаған ол, өзін жалғыз сезініп, жұрттың назарында болудан қорықты. Бірақ, осы қиын сәттерде жақындары оның жанынан табылып, қолдау көрсетіп, өмірін қайта бастауға көмектесті.
– Менің тағдырыма әрқашан жақындарымның қолдауы күшті болды. Олар маған сенім артып, мені өзімді қайта табуға көмектесті. Көзім көрмесе де, өмірде әлі де көп нәрсе бар екеніне көзім жетті. Қолдаудың арқасында екі жоғары оқу орнын бітірдім. Жарым Айнұр Тайжанова, жеңіл атлетикадан халықаралық спорт шебері, менің еңсемді тіктеуге септігін тигізді, – деп еске алады Бауыржан.
Бауыржан Әбіловтің өміріндегі ең үлкен өзгерістердің бірі – футболға қайта оралуы болды. Көзі көрмейтін адамдарға арналған футбол командасының мүшесі ретінде ол өзіне жаңа мақсат тауып, осы спорт түріне деген сүйіспеншілігін қайта жаңартты. Бүгінде ол «Қайрат» клубы жанынан құрылған «Blind Football» командасының құрамында ойнайды.
Көзі көрмейтін спортшылардың аяқ жолын таяқ арқылы сезініп, футбол ойнауы көрермендерді таңғалдырмай қоймайды. Әрбір ойын олардың еркін қимылын, дағдыларын және ерекше шеберлігін көрсетеді. Бұл күрделі, бірақ өте қызықты процесс. Бауыржан мен оның командасы әр күн сайын жаттығып, өздерінің шеберліктерін шыңдайды.
Бауыржан қазіргі уақытта Қазақстанның көзі көрмейтіндерден құралған ұлттық құрамасының мүшесі болып, еліміздің намысын қорғап жүр. Ол үшін футбол тек ойын емес, ол – еркіндікті, рухты сезіну мүмкіндігі.
– «Көзі көрмейтін адамдарға арналған футбол барын естігенде қатты қуандым. Алғашқыда аздап абдырап қалғаным рас, бірақ кейін бәрін меңгеріп, өзімді үйреттім, – дейді Бауыржан өзінің алғашқы ойындары туралы.
Ұлттық құраманың бапкері Анатолий Антипин Бауыржанның шеберлігін жоғары бағалап, оны жиі «Забилов» деп әзілдейді, себебі ол көп гол соғады. Оның арқасында Қазақстан бірнеше мәрте халықаралық турнирлерде жеңіске жетіп, ел абыройын асқақтатты. Бауыржан мен оның командасы Үндістан, Таиланд, Германия мен Ресейде өткен халықаралық жарыстарда ел намысын қорғап қайтты. Алда Польшада өтетін жарысқа дайындық жүріп жатыр.
Бауыржан Әбіловтың өмірі – қиындыққа қарсы күрес пен ерік-жігердің, өзіңді жоғалтпай, жаңа мүмкіндіктерге қол жеткізу жолындағы табандылықтың айқын үлгісі.
