Елдос Сметов дзюдодан ел тарихындағы тұңғыш Олимпиада чемпионы болды.
60 келі салмақта белдескен Қазақстан спортшысы финалда кілем қожайыны франциялық Лука Мхелидзені жеңіп, спорттық мансабындағы үшінші Олимпиадасында алтын жүлдеге қол жеткізді.
Айта кетейік, осыған дейін Елдос Сметов 2016 жылы күміс, 2020 жылы қола жүлде еншілеген еді.
Бұл − Париж Олимпиадасындағы Қазақстан қоржынындағы алғашқы алтын жүлде. Олимпиада ойындарының екінші күнінің қорытындысы бойынша ұлттық құрама 1 алтын және 2 қола жүлделерін қоржынға салды.
Жалпыкомандалық есепте «Қазақстан» құрамасы жетінші орында тұр.
