Алматы көшелерінде сан құбылып, түрлі-түсті жарнамалармен жарқыраған «ЛЭД-экрандар» бүгінде қаланың ажырамас бөлігіне айналды. Жарықдиодты технологиялар жарнама индустриясында статикалық суреттерден әлдеқайда тиімді екенін дәлелдеп үлгерді. Бұрын құлаққа тосын естілген «ЛЭД-экран» атауы да бүгінде көпшілікке таныс ұғым.
Қайрат Жастарбекұлы – Алматыдағы «ЛЭД-экран» индустриясының 40 пайызын қамтып отырған кәсіпкер. Ол тек оңтүстік астанамен шектелмей, Қырғызстан астанасы Бішкекте «Aray-LED» компаниясының филиалын ашқан. Қазір Астана мен Шымкентте бөлімшелерін іске қосу үшін қызу дайындық жүргізіп жатыр. Оның айтуынша, Алматының орталық көшелеріндегі «ЛЭД-экрандардың» микросхемалары мен мониторлары Қытайдан жеткізіледі, алайда оларды басқаруға қажетті жабдықтар, дыбыс-қозғалтқыш құрылғылары және басқа да қосымша элементтер өздерінің өндірісінде жасалады. Компания тек дайын өнімді әкелумен шектелмей, оны жергілікті нарыққа бейімдеп, жаңа технологиялық шешімдерді енгізуге басымдық береді.
Қайрат Жастарбекұлы Алтай өңірінде дүниеге келген. Атажұртқа оралып, өз ісін бастауды мектеп кезінен армандаған. 2000 жылдардың ортасында Қытайға барып, бұл елдің технологиялық даму қарқынын өз көзімен көргеннен кейін, Қазақстанда «ЛЭД-экран» нарығының болашағын бағамдаған. Ол кезде Алматыдағы экрандардың басым бөлігі шетелдік компаниялардың иелігінде болатын. Отбасының қаржылық қолдауымен жаңа бизнесті бастауға шешім қабылдап, осы салада келешегі зор бизнес түрін бастады.
Қазіргі таңда «Aray-LED» банктер мен ірі кәсіпорындармен серіктестік орнатып, Алматы қаласының көрнекті жерлерінде өз жобаларын жүзеге асырып келеді. Мысалы, әл-Фараби даңғылы бойындағы 650 шаршы метрлік алып «ЛЭД-экран» компанияның ең ірі жобаларының бірі. Ол бүгінде қаланың сәулеттік нышандарының біріне айналды. Сонымен қатар, «Алматы» сауда ойын-сауық орталығындағы шамшырақ бейнесіндегі «ЛЭД-стелла» да осы компанияның өнімі.
Цифрлық жарнама нарығы жыл сайын өзгеріп, дамып келеді. Зерттеулер көрсеткендей, анимация және бейне форматындағы ақпарат статикалық мәтін мен суретке қарағанда 30 пайызға жақсы есте сақталады. Осыны ескерген компания үнемі жаңа идеялар ұсынып, трендтерден қалып қоймауға тырысуда.
«Aray-LED» қызметкерлеріне де ерекше көңіл бөледі. Компанияның жылдық қаржы айналымы – 2 миллиард доллар, ал қызметкерлерінің жалақысы 500 мың теңгеден басталады. Бұдан бөлек, компания өз мамандарына баспана мен көлік алу үшін пайызсыз несие беріп, әлеуметтік және медициналық сақтандыру шығындарын өз мойнына алған.
Кәсіпкер болашақта «ЛЭД-экран» өндірісін жалпы Қазақстанда дамытуды көздеп отыр. Дегенмен, микросхемалар өндірісінде көш бастап тұрған Тайвань тек ірі экспорттаушылармен жұмыс істейтіндіктен, бұл нарыққа кіру оңай емес. Бірақ, Орталық Азия нарығын кеңейту арқылы бұл бағытта да жаңа мүмкіндіктер ашылатынына сенімді.
«Aray-LED» бүгінде Қазақстанның ЛЭД-индустриясында жетекші орын алып қана қоймай, халықаралық деңгейде де өз орнын нығайтуға қадам жасап жатыр.
