Сарысу ауданынының атын айдай әлемге шығарып жүрген спортшылар аз емес. Әлемдік додаларда жеңіс тұғырына көтеріліп, көк Туымызды желбіретіп, мемлекеттік Гимді шырқатып жүрген осындай спорт жұлдыздарымен сарысулықтар орынды мақтанады.
Жақында Үндістан астанасы Дели қаласында қазақ күресінен ересектер арасында Әлем чемпионаты өткені мәлім. Төрткүл дүние көз тіккен әлемдік додада Жайылма ауылындағы Б.Тоғызақбаев атындағы спорт мектебінің түлегі Нұр Амашүкір олжа салып, екі дүркін әлем чемпионы атанды. Сарысулықтарды ғана емес, Қазақстанның мерейін үстем еткен атақты палуаныды жерлестері – Сарысу ауданының тұрғындары барынша сән-салтанатпен қарсы алып, құрмет көрсетті.
Сарысулықтар әлемдік додада екінші рет топ жарған палуанды аудан орталығы Жаңатас қаласына кіреберісте күтіп алды. Аудандық мәдениет үйінде өткен салаттанатты іс-шарада аудан әкімінің орынбасары Ерлан Ермағанбетов жерлес палуанды әлемдік байрақты бәсекеде жеңіске жетуімен құттықтап, ізгі тілегін арнады.
– Үндістанның Дели қаласында қазақ күресінен ересектер арасында Әлем чемпионатында еліміздің мерейін асырған жеңісіңізбен құттықтаймыз! Бұл күллі еліміздің және ауданымыздың мәртебесін асырған айтулы оқиға болды. Жеңісті күндеріңіз көп болсын! Біз Сізді әлі талай биіктерді бағындырады деп сенеміз, – деп, әлемнің екі дүркін чемпионына «Сарысу ауданына сіңірген еңбегі үшін» төсбелгісін және қаржылай сыйлық тапсырды. Чемпионның жаттықтырушысы Манарбек Тоғымановқа да бағалы сыйлық тапсырылып, аудан әкімінің Алғысхатымен марапатталды. «Қазфосфат» ЖШС «Қаратау» тау-кен өңдеу кешенінің персонал жөніндегі директоры Жандос Жақаев іргелі өндіріс орны атынанан палуаннның иығына шапан жапты. «Аманат» қайырымдылық қорының жетекшісі Самат Жанқожаев та ізгі тілегін арнап, сый-сыяпат жасады. Аудандық ардагерлер кеңесінің мүшесі Шәріпбек Қалжанов әлдемдік додада топ жарып, екінші рет әлем чемпионы атанған жерлестерін құттықтап, батасын берді.
Нұр Аманшүкір мен жаттықтырушысы Манарбек Тоғыманов өздерін ерекше қарсы алып, құрмет көрсеткен жерлестеріне, аудан басшылығына алғыс айтты. Сарысулық өнерпаздар концерттік бағдарламаларын ұсынды. Осындай құрмет Жайылма ауылында жалғасын тапты.
