Алматы технологиялық кәсіпкерлік пен жасанды интеллект саласындағы жаңа жобаларды шоғырландыратын орталыққа айналуға бет алып келеді. Қалада жүзеге асырылып жатқан Almaty AI Hub пен Almaty AI Park жобалары осы бағыттағы маңызды қадамдардың бірі болмақ. Мұнда IT мамандары мен жас кәсіпкерлерден бастап, ғалымдар мен ірі технологиялық компанияларға дейін бір ортада жұмыс істеуге мүмкіндік алады.
Қазір цифрлық экономиканың дамуы ең алдымен білікті маманға, жаңа идеяға және оны жүзеге асыратын ортаға байланысты. Осы тұрғыдан алғанда, Алматыда салынып жатқан жаңа нысандардың негізгі ерекшелігі – тек жұмыс орны ретінде емес, идеядан нақты өнімге дейінгі жолды қысқартатын алаң ретінде қарастырылуында.
Солардың бірі – Көктем-3 шағынауданындағы Almaty AI Hub. Бұрынғы ғимаратты қайта жаңғырту арқылы құрылып жатқан орталықтың аумағы 9,4 мың шаршы метрден асады. Мұнда 556 жұмыс орны қарастырылған. Болашақ хабта IT компаниялары мен стартаптарға арналған кеңселер, әзірлеушілердің жұмыс кеңістігі, коворкингтер, оқу орындары және түрлі іс-шараларға арналған залдар орналасады.
Орталықта жасанды интеллект мектебі мен AI Campus іске қосылуы жоспарланып отыр. Бұл жерде жаңа технологияларды меңгеруге, тәжірибе жинақтауға және өз жобасын дамытуға ниетті жастарға мүмкіндік беріледі. Робототехникаға да жеке көңіл бөлініп, демонстрациялық және тәжірибелік алаңдар жасалмақ.
Яғни AI Hub-тың негізгі міндеті – технология саласына енді қадам басқан жас маман мен нарықта орны қалыптасқан компанияны бір ортаға жақындату. Мұндай байланыс тәжірибе алмасуға ғана емес, жаңа жобалардың пайда болуына да ықпал етуі мүмкін.
Ал көлемі жағынан ауқымды Almaty AI Park жобасы 4,9 гектар аумақта орналасады. Кешеннің жалпы ауданы шамамен 76 мың шаршы метр болмақ. Құрылысты екі кезеңге бөліп жүзеге асыру көзделген: бірінші кезеңі 2027 жылдың желтоқсанында, екінші кезеңі 2028 жылдың желтоқсанында аяқталуы жоспарланған.
AI Park-тың басты бағыты – технологиялық бизнесті ғылыммен ұштастыру. Кешенде жасанды интеллект және ғылыми-зерттеу зертханалары, технологиялық компанияларға арналған кеңселер, коворкингтер, акселератор мен бизнес-инкубатор жұмыс істейді. Сонымен бірге мұнда болашақ IT мамандарын даярлайтын университет ашу жоспарланып отыр.
Бұл жерде стартаптарға ерекше мүмкіндік берілмек. Жас компаниялар өз жобаларын жетілдіріп қана қоймай, оны таныстыруға, серіктес табуға және инвестиция тартуға жағдай алады. Ғылыми зертханалар болса жаңа технологияларды тәжірибеден өткізуге арналған база қызметін атқарады.
Екі жобаның да түпкі мақсаты – Алматыда технологиялық бизнестің толыққанды ортасын қалыптастыру. Мұнда маман білім алады, зерттеу жүргізеді, идея ұсынады, команда құрады, стартапын дамытады және дайын өнімін нарыққа шығаруға мүмкіндік алады. Осы тізбектің бір жерде қалыптасуы технологиялық жобалардың дамуын жеделдетуі ықтимал.
Алматы үшін бұл бастамалардың тағы бір маңызы – қаланың инновациялық тартымдылығын арттыру. Заманауи инфрақұрылымның болуы отандық IT мамандары мен компанияларына жаңа мүмкіндік берумен қатар, шетелдік технологиялық жобалар мен инвесторлардың назарын аударуға жағдай жасайды.
Сондықтан Almaty AI Hub пен Almaty AI Park-ты тек жаңа ғимараттар ретінде бағалау жеткіліксіз. Бұл жобалар Алматының цифрлық экономикаға бейімделуіне, жасанды интеллект саласында мамандар мен жаңа технологиялық өнімдер қалыптастыруға бағытталған ұзақ мерзімді инфрақұрылымдық бастама ретінде қарастырылып отыр.
Алдағы жылдары аталған нысандардың іске қосылуы қаланың IT саласындағы әлеуетін кеңейтіп, жаңа идеялардың нақты жобаға, ал зерттеу жұмыстарының коммерциялық өнімге айналуына жол ашуы мүмкін.
