Орталық коммуникациялар қызметі алаңында өткен баспасөз мәслихатында Сауда және интеграция вице-министрі Әсет Нүсіпов министрлікке қазақстандықтардан маркетплейстер арқылы сатып алуға қатысты көптеген шағым түсетінін, олар сатушымен кері байланыстың жоқтығына, зияткерлік меншік құқығын қорғауға, тауарлардың сапасына және басқаларға қатысты екенін айта келіп, ведомство жағдайды түзету үшін заңнаманы жетілдіру бойынша жұмыс жүргізіп жатқанын жеткізді.
Вице-министрдің айтуынша, Парламент Мәжілісінде тұтынушылардың электрондық саудадағы құқықтарын қорғауға бағытталған түзетулер қарастырылуда. Спикер онлайн сауданы дамыту факторларының бірі қойма және логистикалық инфрақұрылымдардың болуы болып табылатынын атап өтті.
– Трансшекаралық онлайн сауданы ынталандыру үшін Қытай тарапы «Trans Post» және Қазпошта бірлескен кәсіпорны шеңберінде Алматы облысында тарату орталығын және Алматы әуежайының аумағында заманауи мультимодальды қойма салу мәселесі пысықталуда. Меншікті инфрақұрылымы бар, ауданы 100 мың шаршы метр жаңа қазақстандық маркетплейс «TEEZ» іске қосылды, жобалық қуатқа шығу кезінде шамамен 10 мың жұмыс орны құрылады. Инвестиция 50 миллион долларды құрады. Сондай-ақ ағымдағы жылы «Ozon» және «Wildberries» маркетплейстері Астана мен Алматыда жалпы ауданы 29 мың шаршы метр болатын үш фулфилмент орталығын салу жоспарлап отыр, инвестициялар 101 миллиард теңгеден асады, – деген Әсет Нүсіпов электрондық сауда саласы жаңа жұмыс орындарын құруға, салық түсімдерінің өсуіне және инвестициялар тартуға ықпал ететінін атап көрсетті.
Сонымен қатар, онлайн сауданы дамыту мыңдаған кәсіпкер үшін, оның ішінде Қазақстан өңірлері үшін нарықтарды қолжетімді етеді. Бизнестің ұлттық және халықаралық деңгейге шығуына кедергілер азаяды және цифрландыруға және қаржылық операциялардың ашықтығын арттыруға ықпал етеді.
